Britaniyalik mashhur aktyor Orlando Blum “Karib dengizi qaroqchilari” franshizasida Uill Tyorner roli bilan yana ekranga qaytishga tayyor ekanini ma’lum qildi. Bu haqda u ITV telekanalining This Morning dasturida bergan intervyusida aytib o‘tdi.
“Menimcha, jamoani yangi loyiha uchun yana bir bor yig‘ish yaxshi bo‘lar edi. Bunday imkoniyat albatta bor”, dedi 47 yoshli aktyor.
Disney studiyasi mashhur franshizaning navbatdagi qismini suratga olish niyatida ekani haqida mish-mishlar bir necha yildan beri tarqalmoqda. Loyiha bir necha sabablar, xususan, ssenariyga o‘zgartirishlar kiritilishi, COVID-19 pandemiyasi, bosh rol ijrochisi Jonni Deppning sud jarayonlari va Gollivuddagi obro‘sining pasayishi tufayli kechiktirilgan.
Disney vakillari 2023-yilda franshizaning yangi qismi ustida ish olib borilayotganini tasdiqlagan. Prodyuserlar bir emas, ikki xil yo‘nalishdagi film ustida ishlayotgani haqida xabarlar bor: ulardan biri bosh qahramonlar bilan bog‘liq voqealarni davom ettiruvchi asosiy film, ikkinchisi esa bosh qahramon ayol kishi bo‘lgan spin-off loyiha bo‘lishi mumkin.
Orlando Blum franshizaning ilk uch qismida Uill Tyorner obrazini gavdalantirgan. “Karib dengizi qaroqchilari” umumiy hisobda besh filmni o‘z ichiga oladi va dunyo bo‘ylab $4,5 milliarddan ortiq daromad keltirgan. Bu uni kino tarixidagi eng daromadli loyihalardan biriga aylantirgan. Filmda Jonni Depp ijro etgan kapitan Jek Chittak obrazi alohida e’tibor qozongan. Shunga qaramay, aktyorning so‘nggi yillardagi sud mojarolari uni franshizadan chetlatilishiga olib kelgan.
Yangi film haqida hozircha rasmiy tafsilotlar berilmagan.
Izoh (0)