Kaskadyorlik mashqlari koordinatori va rejissyor Ueyd Istvudning so‘zlariga ko‘ra, “Uddalab bo‘lmas topshiriq” franshizasining so‘nggi qismini suratga olish paytida Tom Kruzni qattiq charchoq tufayli qo‘lda olib ketishga majbur bo‘lishgan.
Hodisa biplandagi havoda suratga olish ishlari tugaganidan keyin sodir bo‘ldi.
“So‘nggi kunlardagi tinimsiz mashg‘ulotlar uni haddan ortiq holdan toydirdi. Ayniqsa, biplandagi tryuk vaqtida kuchli shamol unga urilar, qattiq portlash natijasida vint va mayda temir zarralari yuziga uchib kelardi. Bu tasavvuringizdan ham xavfli va og‘ir mashg‘ulotlar edi. Biz Kruzni biplan qanotidan qo‘lda ko‘tarib chiqarishga majbur bo‘ldik”, dedi rejissyor.
2013-yildan beri Kruz bilan hamkorlik qilib kelayotgan Ueyd Istvud uning suratga olish maydonchasidagi mashg‘ulotlarga doimo butun kuch va g‘ayratini berib ishtirok etishi va barcha tryuklarni mustaqil bajarishi haqida ham alohida to‘xtalib o‘tdi:
“Tom hech qachon o‘zidagi qo‘rquvni ko‘rsatmaydi, kaskadyorlik ishlari qanchalik og‘ir bo‘lmasin, uning yuzidan tabassum arimaydi. Aktyor doim ijobiy kayfiyatda qolishga harakat qiladi va o‘z ishidan chin dildan zavqlanadi”, qo‘shimcha qildi rejissyor.
Bundan tashqari, filmda suratga tushish uchun Kruz 500 martadan ortiq parashyutdan sakragan va 13 ming marta motosiklda murakkab ishlarni bajargan.
“Tom mashinaga o‘xshaydi. U o‘zini xuddi 20 yoshli boladek tutadi. Menimcha, buning hech qanday yashirin siri yo‘q, shunchaki, u to‘g‘ri ovqatlanish, sog‘lom ratsion, sport va intizomga amal qiladi” dedi Istvud.
Ammo rejissyorning so‘zlariga ko‘ra, bu filmdagi eng xavfli tryuk emas. Kristofer Makkuarrining aytishicha, yangi loyihada Tom Kruz yanada aqlbovar qilmaydigan ishlarni bajargan. “Uddalab bo‘lmas topshiriq 8: yakuniy hisob-kitob” filmining premyerasi 2025-yil 23-may kuni bo‘lib o‘tdi.
Ma’lumot uchun: Tom Kruz Nyu Yorkda muhandis va o‘qituvchi oilasida tug‘ilgan. U aktyorlikka ilk qadamlarini 10 yoshida maktab teatr klubida qo‘ygan. U “Vampir bilan intervyu”, “Uddalab bo‘lmas topshiriq”, “Top Gan” jangovar filmlari, “Magnoliya”, “Vanilrang osmon”, “So‘nggi samuray” dramalari va boshqa ko‘plab filmlarda unutilmas obrazlarni gavdalantirdi. Uzoq yillik faoliyati davomida u “Oskar”ga nomzod va “Oltin globus” g‘olibi sifatida bir nechta mukofotlarga sazovor bo‘ldi.
Izoh (0)