To‘y marosimlari har doim hayotimizdagi eng yorqin va unutilmas voqealardan biri bo‘lib qoladi. Film va seriallarda ko‘rsatilgan to‘ylar esa bizga turli uslub va an’analarni namoyish etadi, ularning har biri o‘ziga xos go‘zallik va romantikani mujassam etgan.
“Haqiqiy muhabbat” (2003) filmi — cherkovdagi tantanali to‘y marosimi
Romantik komediyalar orasida afsonaga aylangan “Haqiqiy muhabbat” filmidagi klassik to‘y marosimi ajoyib o‘tadi. Qahramonlar — Kira Naytli va Chivetel Ejiofor obrazidagi juftlik — qadimiy cherkovda, oppoq guldastalar bilan nafis bezatilgan muhitda nikohdan o‘tadi.
Oppoq gullar kelinning nafis libosini mukammal to‘ldiradi: yarim shaffof, oq patlar bilan bezatilgan, uzun yengli va orqasida etakli nafis ko‘ylak. Kelinning sochlari esa yig‘ilgan obrazda.
Kuyov esa mutlaqo qarama-qarshi uslubda — qora kostyum, oq ko‘ylak va shunga mos galstukda. Ularning liboslaridagi farq sevishganlarning uyg‘unligini yanada yaqqol ko‘rsatadi.
To‘y marosimining eng hayratlanarli lahzasi esa kuyovning eng yaqin do‘sti tomonidan tayyorlangan kutilmagan sovg‘a bo‘ladi. Zalda o‘tirgan guruh a’zolari kutilmaganda o‘rinlaridan turib, The Beatles’ning All You Need Is Love qo‘shig‘ini ijro eta boshlaydi. Musiqiy tabrik yoshlarni hayratga soladi va ularning yuzida baxt porlaydi.
“Anora” (2024) filmi — oddiy va erkin uslubdagi kamtarona to‘y
Ushbu to‘yda dabdabali liboslar, uzun etaklar yoki mehmonlar yo‘q — faqatgina oddiy nikoh marosimi. Marosimda kuyov va kelindan tashqari faqat nikoh qayd etuvchi ishtirok etadi. Mayki Medison ijrosidagi kelin qaymoq rangli korset va kalta jinsi shortik kiygan.
Kelin oddiy kundalik soch turmagini tanlaydi. Kuyov esa biroz noodatiy ko‘rinishda: Mark Eydelshteyn obrazidagi yigit qaymoq rangli, zamonaviy rus brendining kostyumini kiygan va uni kelinning guldastasiga mos yorqin qizil atirgul bilan to‘ldirgan.
Marosimdan so‘ng ular kechki Las-Vegas bo‘ylab sayrga chiqadi — qo‘shiq aytadi, raqs tushadi va zavqlanadi. Kamtarona to‘y orzusidagi yoshlar uchun “Anora” filmidagi bu g‘oya ajoyib ilhom bo‘lishi mumkin.
“Sevgi iztirobi” (2015–2017) seriali — dengiz sohilidagi to‘y
Turkiyaning mashhur “Sevgi iztirobi” serialidagi bosh qahramonlar kabi to‘y qilishni istaganlar uchun bu marosim ideal tanlov bo‘lishi mumkin. Ayniqsa, tabiat qo‘ynida yoki dengiz bo‘yida o‘tadigan marosimni orzu qiluvchilar uchun ayni muddao. Bu to‘yda har bir jihat — joy tanlovi, dastur, liboslar mukammal o‘ylangan.
Avvaliga baxtli juftlik yog‘och yo‘lak bo‘ylab tantanali ravishda yurib keladi, ularni oq libosli kichik qizchalar qurshab oladi. Kelin (Neslihan Atagul) qo‘lida guldasta ushlab turadi — marosim maydoni ham aynan shu gullar bilan bezatilgan.
Eng hayratlanarli jihati — nikoh o‘qiladigan maydon bevosita dengiz ichida joylashgan. Ya’ni ular suvda turib turmush quradi. Bu ularning muhabbat hikoyasining qanday boshlangani haqida ramziy ma’no beradi.
Kelinga tanlangan obraz to‘y marosimiga juda mos tushadi. V-ko‘rinishidagi yoqasi bor, yarim shaffof uzun yengli libos dengiz ko‘piklari naqshi va to‘r bilan bezatilgan. Sochiga dengiz chig‘anoqlari solingan halqa taqilgan, bo‘ynida esa nafis taqinchoq bor.
Kelinning ko‘rinishidan dengiz shabadasi va yengil to‘lqinlar ohangi seziladi. Ya’ni bu to‘yda eng mayda tafsilotgacha puxta o‘ylangan. Axir qahramonlar bu kunni uzoq kutgan.
Kuyov (Burak O‘zchivit) esa oppoq kostyumda. Butun marosimda oq va och ranglar ustun bo‘lib, bayramga yengillik va nur baxsh etadi.
Nikohdan so‘ng kelin-kuyov va mehmonlar quvnoq raqsga tushadi, quyosh botishini tomosha qilishadi va osmonga fonuslar uchiradi.
“Mamma MIA” (2008) filmidagi to‘y — yunoncha uslubdagi marosim
“Mamma MIA” musiqiy filmidagi to‘y marosimini ham bemalol romantik deb atash mumkin. Chunki u yunoncha uslubda tashkil etilgan va, albatta, Gretsiyada bo‘lib o‘tadi. Juftlik tog‘lar tepasida joylashgan, milliy uslubdagi ibodatxonada nikohdan o‘tadi. Marosimga tosh devorlar, yog‘och mebellar, ko‘plab shamlar, quyosh botishi va dengiz manzarasi, jonli musiqa kabi detallar o‘zgacha joziba berib turadi.
Amanda Seyfrid kiygan to‘y libosi moda tarixida yorqin iz qoldirgan: yengil, oqish tusdagi tuldan tikilgan, charog‘on gullar bilan bezatilgan va ko‘p qavatli etagi kengayib tushadigan nafis libos. Bu obrazga moslab tanlangan soch turmagi ham juda o‘rinli: tabiiy jingalaklar, oltinrang gulchambar.
Kuyov esa qora ko‘ylak bilan kombinatsiyalangan oq kostyumda. Juftlik bir-birini nafislik bilan to‘ldirib turadi.
“Qalbim eshigini qoq” (2020–2021) seriali
Turk seriallari orasida mashhur bo‘lgan “Qalbim eshigini qoq” serialidagi sokin, oilaviy to‘y marosimi ushbu ro‘yxatga yakun yasaydi. Bu to‘y marosimining eng muhim jihati — uning kutilmagan sovg‘a sifatida tashkil etilgani bo‘ldi. Kuyov (Kerem Byursin) sevgan insoni (Hande Erchel) uchun barcha tayyorgarlikni o‘zi amalga oshirib, unga yoqimli kutilmagan sovg‘a taqdim etadi.
Marosim ochiq havoda — yam-yashil tabiat bag‘rida, havo sharlarining mo‘l-ko‘lligi bilan bezatilgan hududda bo‘lib o‘tadi.
Kelin tanlagan libos — kalta, keng yengli va to‘rtburchak yoqali bo‘lib, uning go‘zal qomatini yanada chiroyli ko‘rsatib turadi. Asosiy qahramon esa oddiy uslubni afzal ko‘rib, och rangli ko‘ylak va klassik uslubdagi shim kiygan.
Ko‘pchilik aynan shunday to‘yni ma’qul ko‘radi, chunki u asosiy e’tiborni juftlik o‘rtasidagi mehr-muhabbatga qaratishga imkon beradi.
Izoh (0)