Londondagi alkogol ichimliklar do‘konidan qiymati 150 ming funt sterling bo‘lgan 285 yillik skripka o‘g‘irlandi. Bu haqda The Guardian nashri xabar bermoqda.
Politsiya bayonotiga ko‘ra, jabrlanuvchi London filarmoniya orkestri musiqachisi David Lopes Ibanez ekanligi aniqlandi.
Ma'lum qilinishicha, Lopes 18-fevral kuni do‘sti bilan Islington tumanidagi Kenonberi ko‘chasida joylashgan “Markiz” alkogol ichimliklar do‘konida dam olgan. O‘sha kechqurun uning yonidagi skripka g‘oyib bo‘lgan. Erkak o‘sha kuniyoq politsiyaga murojaat qilgan, biroq bir necha oylik qidiruvlar hech qanday natija bermagan. Asbob hamon topilmagan.
London politsiyasi gumonlanuvchini qidirayotganini ma’lum qilib, kuzatuv kameralaridagi yozuvlarni e’lon qildi. Tasvirlarda qora kiyimdagi shaxs qo‘lida skripka g‘ilofi va o‘ralgan plashni ushlab, pabdan chiqib ketayotgani ko‘rinadi. Shuningdek, politsiya musiqa asbobining fotosuratlarini ham e’lon qilgan.
“Bu skripka juda qimmatbaho, jabrlanuvchi uchun esa bebaho. Iltimos, aybdorni topish va skripkani qonuniy egasiga qaytarishda bizga yordam bering”, -deya ta’kidlagan politsiya vakili.
Ma’lum qilinishicha, skripkani 1740-yilda florensiyalik usta Lorenzo Karkassi yasagan. Hozirgi kunda uning qiymati 150 ming funt sterlingdan oshadi. Bu skripkani musiqachiga nemis tadbirkorlaridan biri uning karyerasiga yordam berish maqsadida vaqtincha foydalanishga bergan. Skripka bilan birga uchta kamoncha ham o‘g‘irlangan bo‘lib, ulardan biri sadaf uchli.
Izoh (0)