Rossiya prezidenti Vladimir Putin 1994-yildayoq Qrim, Sharqiy Ukraina va Shimoliy Qozog‘istonga hududiy da’volarini bildirgan. Bu haqda Germaniya Tashqi ishlar vazirligi arxiv hujjatlariga tayanib, Der Spiegel xabar berdi.
Bu ma’lumotlar Germaniyadagi Zamonaviy tarix instituti (Institut für Zeitgeschichte) tomonidan chop etilgan “Germaniya federativ respublikasi tashqi siyosati hujjatlari” to‘plamining yangi jildida keltirilgan. Yangi nashr 1994-yilning birinchi yarmiga bag‘ishlangan. Der Spiegel jurnalistlari u bilan tanishib chiqqan.
Hujjatlardan birida GFRning Sankt-Peterburgdagi bosh konsuli qaydlari keltirib o‘tilgan. Diplomat 1994-yil 14-yanvardagi Putinning “ta’kid” bilan aytgan bayonotlarini yodga olgan.
Uning aytishicha, Qrim, Sharqiy Ukraina va Shimoliy Qozog‘iston — kamida shu hududlar — hech qachon Rossiya uchun xorij bo‘lmagan, ular doim Rossiyaning bir qismi bo‘lgan. Hech bir rossiyalikka bu hududlar qanday qilib boshqa davlat tarkibida qolayotganini tushuntirib bo‘lmaydi, deya Putinning so‘zlarini germaniyalik diplomat keltirgan.
Putin bu rossiyaliklar uchun milliy masala bo‘lib, nemislar anglashda qiynalishi mumkinligini aytgan. Shuningdek, agar ruslarning Ukraina va Qozog‘istondagi iqtisodiy hamda ijtimoiy ahvoli qoniqarli bo‘lsa, “muammo yo‘q” deb ta’kidlagan.
“G‘arb mamlakatlarini “agar Rossiya manfaatlarini oqilona himoya qilishni Rossiya imperializmining qayta tiklanishi deb atasa, bu haqda yetarli ma’lumotga ega emaslar”, deya Putin so‘zlarini nemis diplomati keltirib o‘tgan.
Izoh (0)