Qozog‘iston pasportlariga qor qoploning tasviri tushiriladi. Bu haqda ichki ishlar vaziri vazifasini bajaruvchi Baurjan Alenovga tayanib Tengrinews xabar berdi.
Vazirlikka ko‘ra, milliy pasportni himoya qilish darajasini oshirish ustida ish olib borilmoqda.
Fuqarolarimiz 43 ta davlatga vizasiz tashrif buyurishi mumkin. Pasport barcha xalqaro standartlarga javob beradi, barcha zarur himoya elementlariga ega. Hozir biz qo‘shimcha himoya darajalarini joriy etish ustida ishlayapmiz, dedi Alenov.
U Qozog‘iston pasportining yangi versiyasi qanday ko‘rinishda bo‘lishini ko‘rsatdi. Rasmda qor qoplonini ko‘rish mumkin, u ko‘pincha davlat ramzlari, sport klublari va boshqa tashkilotlarning emblemalarida aks ettirilgan.
May oyida Qozog‘istonda shaxsni tasdiqlovchi hujjatlarni rasmiylashtirish va almashtirish tartibiga o‘zgartirishlar kiritilishi mumkinligi xabar qilingandi. IIV amal qilmaydigan hujjatlarning takroriy foydalanilishi holatlari ko‘paygani sababli yangi hujjat rasmiylashtirilayotganda eskilarini darhol olib qo‘yishni taklif qilgan. Hozircha bu faqat pasportlarga taalluqlidir.
2025-yilgi Henley Passport Index reytingida Qozog‘iston pasporti 65-o‘rinni egallagan edi. Bu o‘tgan yilga nisbatan bir pog‘ona yuqoridir. Qozog‘iston fuqarolari hozirda 77 ta davlatga vizasiz yoki soddalashtirilgan tartibda bora oladi. Reytingda Singapur yetakchilik qilmoqda (195 ta vizasiz yo‘nalish), eng quyi o‘rinni esa Afg‘oniston egallagan (26 ta mamlakat). O‘zbekiston esa 80-o‘rinni (62 ta davlatga vizasiz borish) qayd etgandi.
Izoh (0)