Xalqaro jinoiy sud 8-iyul kuni “Tolibon” yetakchisi Haybatulloh Oxundzoda va Afg‘oniston Oliy sudi rahbari Abdul Hakim Haqqoniyni ayollarni ta’qib qilishda ayblab, ularni hibsga olishga order berdi. Bu haqda CNN xabar berdi.
Bu ikki yetakchi “Tolibon”ning gender siyosatiga “mos kelmaydigan” ayol va qizlarga “buyruq berish, undash yoki da’vat qilish”da aybdor deb topilgan.
“‘Tolibon’ning oliy rahbari Haybatulloh Oxundzoda va guruh bosh sudyasi Abdul Hakim Haqqoniy 2021-yil 15-avgustdan beri gender asosida ta’qiblar amalga oshirgani uchun jinoiy javobgarlikka tortildi”, deyiladi XJS bayonotida.
“Tolibon” hibsga olish orderlarini “bema’nilik” deb atab, XJSni tan olmasligini ma’lum qilgan. Shuningdek, sud “sof islom diniga dushmanlik va nafrat” ko‘rsatayotgani ta’kidlangan.
XJSga ko‘ra, “Tolibon” 2021-yil avgust oyida Afg‘onistonni o‘z nazoratiga olganidan beri ayollar va qizlarga nisbatan “zug‘um” o‘tkazib kelgan. Hattoki, jamoat joylarida ayollar ovozini “bostirgan”.
Afg‘onistonda qizlarga oltinchi sinfdan keyin ta’lim olish taqiqlangan. Ayollar jamoat joylarida yopiq kiyimlarda yurishi lozim. Shuningdek, ular bilan qarindosh bo‘lmagan erkaklarga qarash man etilgan.
“‘Tolibon’ aholiga umumiy qoida va taqiqlar qo‘ygan bo‘lsa-da, ular ayollarni asosiy huquq va erkinliklardan mahrum qilgan”, deyiladi XJS bayonotida.
Hibsga olish orderlari BMT Bosh Assambleyasining Afg‘onistondagi vaziyat bo‘yicha rezolyutsiyasi qabul qilinganidan keyin berilgan. Unda “Afg‘onistondagi barcha ayol va qizlarga nisbatan og‘ir, kuchayib borayotgan, keng tarqalgan va tizimli zulmdan jiddiy xavotir” bildirilgan. Shuningdek, harakatni bu siyosatni tezroq o‘zgartirishga chaqirilgan.
Izoh (0)