Afg‘oniston poytaxti Qobul 2030-yilgacha butunlay suvsiz qoladigan birinchi shahar bo‘lishi mumkin. Bu haqda Afghanistan International xabar berdi.
Hisobotlarga ko‘ra, so‘nggi 10 yil ichida keng ko‘lamli shaharlashtirish va iqlim o‘zgarishi tufayli Qobuldagi suv sathi 30 metrga pasaygan.
The Guardian’ga ko‘ra, hozirda yiliga 44 million kub metr deb baholangan yerosti suvlarini qazib olish hajmi oshib ketmoqda. Agar bu hol davom etsa, shaharning yerosti zaxiralari 5 yildan kamroq vaqt ichida tugab, Qobulning 7 million aholisi uchun xavf tug‘dirishi mumkin.
Afg‘onistondagi “Mehr-shafqat korpusi”ning mamlakat bo‘yicha direktori Deyn Karri vaziyatning dolzarbligini ta’kidlab shunday dedi:
“Bu muammoni xalqaro hamjamiyat e’tiboriga havola etib inqirozga qarshi kurashishga jiddiy bel bog‘lash zarur”.
Karrining aytishicha, Afg‘onistonning suv infratuzilmasi xalqaro yordamga bog‘liq bo‘lib, “Tolibon” hokimiyatga kelganidan keyin siyosiy xavotirlar tufayli moliyalashtirish muzlatib qo‘yilgan.
Ta’kidlanishicha, Qobuldagi yerosti suvlarining 80 foizi ichish uchun yaroqli emas. Kanalizatsiya suvlarining ifloslanish darajasi juda yuqori. Suv ta’minoti aholi uchun kundalik muammoga aylangan. Ba’zi oilalar daromadining 30 foizini suvga sarflaydi, 2/3 qismidan ko‘prog‘i esa suv bilan bog‘liq xarajatlar tufayli qarzga botgan.
Qobul aholisi 2001-yilda 1 milliondan kam bo‘lgan bo‘lsa, bugungi kunda 7 milliondan oshgan. Bu esa suvga bo‘lgan talabni keskin oshirib yuborgan. Samarali boshqaruv, tartibga solish va nazoratning yo‘qligi so‘nggi 20 yil ichida vaziyatni yanada yomonlashtirgan
Izoh (0)