Jinoyat ishlari bo‘yicha Chilonzor tuman sudida 22-noyabr kuni Kabul Dusovga (1984-yilda Samarqand viloyatida tug‘ilgan) oid jinoyat ishini ko‘rib chiqish bo‘yicha ochiq sud jarayoni yakunlanib, sud hukmi eʼlon qilindi. Bu haqda Oliy sud matbuot xizmati xabar berdi.

Dusov ustidan Maktabgacha va maktab taʼlimi vazirining o‘rinbosari Farhod Boqiyev jabrlanuvchi sifatida ariza bergan. Bu haqda Kabul Dusovning o‘zi ham post yozgan. U, bundan tashqari, ko‘plab postlarida vazir o‘rinbosari faoliyati to‘g‘risida haqoratomuz so‘zlar ishlatgan.

Ushbu jinoyat ishi birinchi instansiyada ko‘rib chiqildi.

Sud sudlanuvchining jinoyat sodir etishdagi aybi jabrlanuvchining ko‘rsatmasidan tashqari, jinoyat ishida to‘plangan dalillar bilan, yaʼni jabrlanuvchilarning arizasi, tushuntirish xatlari, guvohlarning ko‘rsatmalari, sudga doir lingvistik ekspertizalar xulosalari, yozuvlar skrinshoti, Facebook ijtimoiy tarmog‘idagi “Kabul Dusov” nomli profilni va Telegram messenjeridagi “Kobul Dusov | Rasmiy kanal” nomli kanalni ko‘zdan kechirish bayonnomasi, sudga doir kompleks ekspertizalar xulosalari hamda jinoyat ishi bo‘yicha barcha to‘plangan, tekshirilgan, ishga aloqadorligi, maqbulligi va ishonchliligi nuqtai nazaridan baholangan dalillar bilan to‘liq isbotlangan deb hisobladi.

Sud hukmiga muvofiq Kabul Dusov jabrlanuvchi F. Boqiyevga nisbatan Jinoyat kodeksining 140-moddasi (haqorat qilish) 3-qismi “a” bandida nazarda tutilgan jinoyatni sodir etganlikda aybli deb topilib, unga 1 yil muddatga ozodlikni cheklash jazosi tayinlandi.

Jinoyat kodeksining 48-1-moddasiga (ozodlikni cheklash) asosan Kabul Dusovga sutkaning muayyan vaqti, yaʼni kech soat 21:00 dan ertalabki soat 07:00 ga qadar yashash joyidan chiqish cheklanadi. Shu bilan birga, unga qo‘shimcha internetdan foydalanmaslik, ommaviy va boshqa tadbirlar o‘tkazishda ishtirok etmaslik belgilandi. 

Bundan tashqari, ayblanuvchiga har oyda bir marotaba yashash joyi bo‘yicha IIO FMB Probatsiya bo‘limidan ro‘yxatdan o‘tib turish hamda mahkumlarni nazorat qiluvchi organning roziligisiz yashash joyini o‘zgartirmaslik kabi taqiqlar yuklandi.

“Mazkur jinoyat ishi bo‘yicha manfaatdor taraflarga yetkazilgan moddiy va maʼnaviy zararlarni undirish yuzasidan fuqarolik sud ishlarini yuritish tartibida sudga murojaat qilish huquqlari mavjudligi tushuntirildi.

Birinchi instansiya sudining hukmi ustidan taraflar qonunda belgilangan tartib va muddatda Toshkent shahar sudining jinoyat ishlari bo‘yicha sudlov hayʼatiga apellyatsiya/kassatsiya tartibida shikoyat berish va protest keltirishga haqliligi maʼlum qilinadi”, – deya qo‘shimcha qilinadi xabarda.

O‘zbekistonda haqorat qilganlik bo‘yicha jinoiy javobgarlik mavjud

Jinoyat kodeksining 140-moddasiga binoan, haqorat qilish, yaʼni shaxsning shaʼni va qadr-qimmatini beodoblik bilan qasddan tahqirlash, basharti, shunday harakatlar uchun maʼmuriy jazo qo‘llanilgandan keyin sodir etilgan bo‘lsa BHMning 200 baravarigacha miqdorda jarima (75 mln so‘m) yoki 240 soatgacha majburiy jamoat ishlari yoxud 1 yilgacha axloq tuzatish ishlari bilan jazolanadi.

Shuningdek, ushbu moddaning 1-qismiga asosan, nashr qilish yoki boshqacha usulda ko‘paytirilgan tarzda, shu jumladan ommaviy axborot vositalarida, telekommunikatsiya tarmoqlarida yoki Internet jahon axborot tarmog‘ida joylashtirish orqali haqorat qilish BHMning 200 baravaridan 400 baravarigacha (75 mlndan 150 mln so‘mgacha) miqdorda jarima yoki 240 soatdan 300 majburiy jamoat ishlari yoxud 1 yildan 2 yilgacha axloq tuzatish ishlari bilan jazolanadi.