Oliy Majlis Qonunchilik palatasining 26-noyabr kuni o‘tkazilgan yig‘ilishida deputat, “Milliy tiklanish” demokratik partiyasi fraksiyasi rahbari Alisher Qodirov byudjet mablag‘lari hisobiga suratga olinayotgan kinofilmlarning keng namoyish etilmayotganini tanqid ostiga oldi.
“Xalqimizning tafakkuri va dunyoqarashini o‘zgartirish bo‘yicha kinofilmlar va bolalar animatsion filmlari yaratish bo‘yicha yaxshigina mablag‘lar ajratilyapti. Buni olqishlaymiz va qo‘llab-quvvatlaymiz.
Lekin bitta muammo, bu ishlab chiqarilayotgan filmlarni kinoprokat, ya’ni kinoteatrlar orqali namoyish qilinyapti. Agar bir yil ichida bu filmni ko‘rgan odamlar soni o‘n mingga boradi, yo bormaydi. Lekin byudjetdan ajratilayotgan bu mablag‘ xalqimizning tafakkurini o‘zgartirish uchun ajratilgan. Nima uchun milliy telekanallar orqali bu keng namoyish qilinmaydi? Yoki byudjetdan bu pulni joyiga qo‘yib qo‘yish talab qilinganmi?
Shuning uchun ham madaniyat vazirligiga biz o‘zimizning takliflarimizni berdik. Bu filmlarni maqsad xalqimizning tafakkurini o‘zgartirish bo‘ladigan bo‘lsa marhamat qilib keng namoyishga qo‘yish kerak”, deydi Alisher Qodirov.
Avvalroq deputat o‘qituvchilar faoliyati samaradorligini baholash tizimini yo‘lga qo‘yish, maktabda o‘qituvchilar o‘rtasida raqobat tizimini yaratish lozimligini bildirgandi.
Ma’lumot uchun, Oliy Majlis Qonunchilik palatasining 26-noyabr kuni o‘tkazilgan yig‘ilishida bir nechta qonun loyihalari deputatlar tomonidan ko‘rib chiqilgan. Jumladan, “2025-yil uchun O‘zbekiston Respublikasining Davlat budjeti to‘g‘risida”gi qonun loyihasi birinchi o‘qishda ko‘rib chiqilgan.
Muhokamalarda fraksiya rahbarlari tomonidan budjet daromadlarini oshirish, soliq bazasini yanada kengaytirish, yashirin iqtisodiy faoliyatni qisqartirish, budjet mablag‘laridan foydalanishda samaradorligini oshirish yuzasidan aniq taklif va tavsiyalar berilgan.
Izoh (0)