Toshkent shahrining Shayxontohur tumanidagi 4-sonli IIB boshlig‘i o‘rinbosari fohishaxona tashkil qilgan ayolga himoyachi bo‘lishga, uni tuman hududida fohishaxona tashkil qilgani uchun javobgar qilmaslikka va’da berdi. Evaziga esa har oy 1500 dollardan ulush olib turishini ma’lum qildi. IIB mansabdorining bu qilmishi sudda ko‘rib chiqildi.
Jinoyat ishlari bo‘yicha Olmazor tuman sudi sudyasi A.Saidov IIB mansabdori va qo‘shmachi ayol o‘rtasidagi muammoni ko‘rib chiqdi.
31 yoshli IIB mansabdori 2023-yil sentyabr oyidan beri Shayxontohur tuman IIO FMB 4-sonli IIB boshlig‘i o‘rinbosari lavozimida ishlab kelib, F.A. ismli ayolning tuman hududida kelgusida fohishalik bilan shug‘ullanib kelishiga sharoit yaratib berish, unga nisbatan qonuniy chora ko‘rmaslik hamda ushbu noqonuniy faoliyatiga rahnamolik qilib turishi evaziga undan har oyda 1500 dollardan pul talab qiladi.
IIB boshlig‘i o‘rinbosari 2024-yilning 14-avgust kuni o‘ziga biriktirilgan xizmat xonasida ayoldan pora tariqasida 1500 dollar pulni olgan vaqtida ashyoviy dalillar bilan qo‘lga olingan, deyiladi sud hujjatlarida.
Sudda aniqlashtirilishicha, Shayxontohur tumani bo‘yicha IIO FMB 4-sonli IIB boshlig‘i o‘rinbosari 2023-yil Yunusobod tumanida o‘tkazilgan tadbirda fohishalik bilan qo‘lga olingan F.A.ni Ma’muriy javobgarlik to‘g‘risidagi kodeksning 190-moddasi bilan ma’muriy javobgarlikka tortish haqida bayonnoma rasmiylashtirgan. O‘sha vaqtda ayol bilan tanishib qolgan mas’ul 2024-yil iyul oyida F.A. va uning ikki nafar farzandini Shayxontohur tumaniga ro‘yxatga qo‘yishga ko‘maklashgan. Va buning evaziga uy egasiga har bir kishi uchun oyiga 200 ming so‘mdan to‘lab turishi kerakligini aytgan. Suhbat davomida ayol Shayxontohur tumani hududida fohishalik bilan shug‘ullansa, uni javobgar qilmasligini, panohiga olishini so‘raydi. Ayol bu ish orqali kuniga 500 dollar pul topishini aytgach, IIB boshlig‘i o‘rinbosari har oy unga bu xizmati uchun avvaliga 2000 dollardan berishi kerakligini, so‘ngra kelishuv asosida 1500 dollardan berib tursa, himoyasiga olishini bildiradi. Biroq tezkor tadbir paytida birinchi ulushini olishga uringan mansabdor qo‘lga olinadi.
Sud IIB mansabdorining qilmishini ko‘rib chiqib, uni aybdor deb topdi va uni ikki yil huquqni muhofaza qiluvchi organlar tizimida ishlash huquqidan mahrum qilib, shuncha muddatga ozodlikdan mahrum qildi.
Izoh (0)