O‘zbekistonda xususiy sektorni “yashil” iqtisodiyotga o‘tishda qo‘llab-quvvatlash maqsadida Germaniyaning 3 mln yevro grant mablag‘larini jalb qilish bo‘yicha memorandum imzolandi. Bu haqda Iqtisodiyot va moliya vazirligi axborot xizmati xabar berdi.

Maʼlum qilinishicha, 13-noyabr kuni Boku shahrida BMTning Iqlim o‘zgarishi bo‘yicha Tomonlar konferensiyasi 29-sessiyasi (COP29) doirasida vazirlik delegatsiyasi Germaniya xalqaro hamkorlik jamiyati (GIZ) katta loyiha direktori Ilka Starrost bilan uchrashuv o‘tkazdi.

Uchrashuvda tomonlarning o‘zaro amalga oshirayotgan loyihalarning joriy holati, xususan tomonlarning o‘zaro hamkorligida amalga oshirilayotgan “O‘zbekistonda xususiy sektorga ko‘mak va iqtisodiy siyosatlar bo‘yicha maslahatlar” loyihasi yuzasidan amalga oshirilayotgan ishlar hamda bu bo‘yicha hamkorlik yo‘nalishlari muhokama qilindi.

Mazkur loyiha hukumatga iqtisodiy islohotlarni amalga oshirish va barqaror iqtisodiy rivojlanish uchun shart-sharoitlarni taʼminlashda, ayniqsa, “yashil” sanoatlashtirish va “yashil” iqtisodiyot bo‘yicha davlat va xususiy sektor salohiyatini kuchaytirishga alohida eʼtibor qaratishda ko‘mak berishi alohida taʼkidlab o‘tildi.

Loyiha issiqxona gazlarini o‘lchash va sertifikatlash bo‘yicha ekspert bilimlarini taqdim etadi, O‘zbekistonning xalqaro issiqxona gazlari savdosida ishtirok etishini va Yevropa ittifoqining Transchegaraviy tartibga solish mexanizmiga (CBAM) moslashishini qo‘llab-quvvatlaydi. 

Xususiy sektor resurslarni tejaydigan, barqaror ishlab chiqarish uchun “yashil” texnologiyalarni moslashtirishda, masalan, aylanma (sirkular) iqtisodiyot va “yashil” sanoat parklari modellari doirasida qo‘llab-quvvatlanadi.

Uchrashuv so‘ngida tomonlar o‘rtasida “O‘zbekistonda xususiy sektorga ko‘mak va iqtisodiy siyosat bo‘yicha maslahatlar” loyihasiga qo‘shimcha ravishda 3 mln yevro miqdoridagi grant mablag‘larini ajratish to‘g‘risida memorandum imzolandi.

“Yashil” iqtisodiyotga o‘tish

Fevral oyida YTTBning O‘zbekistondagi rahbari Andi Aranitasi “Daryo” bilan suhbatda bankning barqaror va inklyuziv o‘sish sari kuchli intilishidan dalolat beruvchi mamlakatdagi ulkan tashabbuslari va loyihalari haqida gapirgan edi. Unda YTTB moliyalashtirish mexanizmlari orqali yashil iqtisodiyotni rivojlantirishda muvaffaqiyatga erishgani aytilgan edi. Yashil iqtisodiyotni moliyalashtirish asosining uy xo‘jaliklarini qamrab olish uchun kengaytirilishi energiya samaradorligi va barqaror amaliyotga nisbatan kengroq majburiyatni aks ettiradi. Bundan tashqari, “Ishbilarmon yoshlar va ayollar” dasturlari kam ta’minlangan jamoalarga moliyaviy va texnik yordam olish imkoniyatini taklif qilish orqali ularni qo‘llab-quvvatllashga qaratilgan.

Iyun oyida Prezidentning “O‘zbekiston Respublikasida “yashil” iqtisodiyotga o‘tishda milliy shaffoflik tizimini joriy etish chora-tadbirlari to‘g‘risida”gi qarori qabul qilingan edi.

Qarorga ko‘ra, O‘zbekistonda “yashil” iqtisodiyotga o‘tish choralarini muvofiqlashtirish bo‘yicha idoralararo kengashga issiqxona gazlarining xatlovi bo‘yicha quyidagi qo‘shimcha vazifalar yuklandi:

• issiqxona gazlari xatlovi hisobotini tasdiqlash;
• xatlov tizimining ichki qoidalarini tasdiqlash va yangilab borish;
• issiqxona gazlari ajratmalarini kamaytirish faoliyatini muvofiqlashtirish;
• xatlov tizimi ishtirokchilarining salohiyatini oshirish choralarini ko‘rish.

Oktyabr oyida Jahon banki direktorlar kengashi O‘zbekistondagi islohotlar dasturini qo‘llab-quvvatlash uchun 800 million dollarlik imtiyozli kreditlar ko‘rinishidagi moliyaviy paketni tasdiqlagandi. Unda xususiy investorlar tomonidan amalga oshirilayotgan ekologik jihatdan toza loyihalarda davlat investitsiyalarining ulushini oshirish belgilangan. Ushbu yondashuv mamlakatga tugab borayotgan tabiiy resurslardan yanada samarali foydalanish va “yashil” iqtisodiyotga o‘tishni tezlashtirish imkonini berishi aytilgan edi.

“Daryo” muxbiri bilan suhbatda kompaniyaning qurilish sohasida Markaziy Osiyo bo‘yicha vitse–prezidenti Entoni Brinkuizen Saudiya Arabistonining ACWA Power kompaniyasi O‘zbekistonda yashil energetika loyihalariga qariyb 15 milliard dollar sarmoya kiritgani haqida aytgandi.