Samarqand viloyati hokimi Erkinjon Turdimov sog‘lig‘i sabab lavozimini tark etishi mumkin. Bu haqda Telegram’dagi “Generalissimus” kanali ma’lum qildi.
Kanal muallifining bildirishicha, Turdimov o‘rniga Hisob palata raisi Adiz Boboyev tayinlanishi kutilmoqda.
“Daryo”ning hukumatdagi manbasi ham mazkur xabarni tasdiqladi. Tahririyat jurnalisti qo‘shimcha ma’lumot olish uchun Samarqand viloyati hokimligi axborot xizmati bilan bog‘landi.
Turdimovning matbuot kotibi Manuchehr Mirzayevning ma’lumot berishicha, bugun viloyat hokimligida odatiy, navbatdagi sessiya bor.
Lekin Telegram’da tarqalayotgan xabar bo‘yicha bilmadim. Hozircha bu haqda gap yo‘q, dedi Manuchehr Mirzayev.
Erkinjon Turdimov 2018-yilda Samarqand viloyati hokimi etib tayinlanib, Turobjon Jo‘rayev o‘rnini egallagandi.
U 2024-yil 5-noyabr kuni Samarqand viloyati hokimi lavozimiga qayta tasdiqlangandi.
Erkinjon Turdimov 55 yoshda. U 1969-yilda Samarqand viloyatida tug‘ilgan. 1991—1995-yillarda “O‘zsanoatqurilishbank” hududiy bo‘limlariga rahbarlik qilgan, 1996-yilgacha Zarafshon hokimi o‘rinbosari lavozimida faoliyat ko‘rsatgan. 1996-yildan 2000-yilgacha Tashqi iqtisodiy faoliyat Milliy bankining Navoiy bo‘limida boshqaruvchisi sifatida ishlagan. 2000-yildan 2008-yilgacha Xatirchi tumani hokimi bo‘lgan. 2008—2016-yillarda Navoiy viloyati hokimi lavozimida ishlagan.
2016-yil dekabridan Samarqand viloyatiga hokim bo‘lguncha Surxondaryo viloyatini boshqarib kelgan.
Turdimov 2006-yilda “Mehnat shuhrati” ordeni bilan, 2024-yil 24-avgustda Fidokorona xizmatlari uchun ordeni bilan mukofotlangan.
Izoh (0)