Shavkat Mirziyoyev Markaziy bank boshqaruvi raisi lavozimiga prezidentning iqtisodiyot sohalarini rivojlantirish, investitsiya va tashqi savdo siyosatini amalga oshirish masalalari bo‘yicha maslahatchisining birinchi o‘rinbosari Timur Ishmetov nomzodini Senatga taqdim etdi.
Markaziy bank raisi lavozimida 2017-yildan buyon Mamarizo Nurmurodov ishlab kelayotgandi. Senat kengashi prezident taqdimnomasiga muvofiq Markaziy bank raisi Mamarizo Nurmurodovni egallab turgan lavozimidan ozod etish to‘g‘risida qaror qabul qildi.
Timur Ishmetov haqida
Timur Ishmetov 1979-yilda Toshkentda tug‘ilgan. 2000-yilda Toshkent moliya institutini, 2005-yilda Birmingem universitetining International Money and Banking yo‘nalishida magistratura bosqichini, 2007-yilda Toshkent yuridik universitetini tamomlagan.
Mehnat faoliyatini 2000-yilda Markaziy bank iqtisodchisi lavozimidan boshlagan. 2017-yil apreligacha turli lavozimlarda faoliyat ko‘rsatdi. Jumladan, turli vaqtlarda Markaziy bankning Monetar operatsiyalar departamenti, Xalqaro rezervlarni boshqarish departamenti, Ichki valyuta bozoridagi operatsiyalar va Valyuta boshqaruvi va nazorati departamentiga rahbarlik qildi.
2017—2019-yillarda Markaziy bank raisi birinchi o‘rinbosari, 2019—2020-yillarda moliya vaziri birinchi o‘rinbosari, 2020—2022-yillarda moliya vaziri kabi vazifalarda faoliyat olib borgan. 2022-yilning dekabridan buyon prezidentning iqtisodiyot sohalarini rivojlantirish, investitsiya va tashqi savdo siyosatini amalga oshirish masalalari bo‘yicha maslahatchisining birinchi o‘rinbosari lavozimida ishlab kelmoqda.
Markaziy banki raisi — boshqaruv raisi Markaziy bank boshqaruvi faoliyati ustidan umumiy rahbarlikni amalga oshiradi. Markaziy bank ijro apparati, Bank xizmatlari isteʼmolchilarining huquqlarini himoya qilish xizmati, Yuridik departamenti hamda Kredit qo‘mitasi faoliyatiga rahbarlik qiladi.
“O‘zbekiston Respublikasining Markaziy banki to‘g‘risida”gi qonunga ko‘ra, Markaziy bank Senatga hisobdordir. Senat prezident taqdimiga ko‘ra Markaziy bank boshqaruvining raisini tayinlaydi va lavozimidan ozod etadi.
Izoh (0)