O‘zbekiston o‘q otish, gandbol va suzish federatsiyalariga raislar saylandi. Bu haqda MOQ matbuot xizmati xabar berdi.
Maʼlum qilinishicha, Milliy Olimpiya qo‘mitasida O‘zbekiston o‘q otish sporti federatsiyasining navbatdan tashqari hisobot-saylov konferensiyasi bo‘lib o‘tdi. Unda federatsiya raisligiga mudofaa vaziri, general-mayor Shuxrat Xalmuxamedov saylandi.
Tadbirda o‘q otish federatsiyasining Los Anjeles-2028 yozgi Olimpiya o‘yinlariga tayyorgarlik rejasi ko‘rib chiqildi.
Shuningdek, MOQda gandbol federatsiyasining navbatdan tashqari hisobot-saylov konferensiyasi tashkil etildi. Unda federatsiyaga yangi rahbar saylandi va Los Anjeles-2028 yozgi Olimpiya o‘yinlariga tayyorgarlik rejasi ko‘rib chiqildi.
Tadbirda “Navoiy kon-metallurgiya kombinati”ning bosh direktori, O‘zbekiston Qahramoni Quvondiq Sanoqulov nomzodi O‘zbekiston gandbol federatsiyasi raisi lavozimiga ilgari surildi. Delegatlar ushbu nomzodni bir ovozdan maʼqulladi.
Bundan tashqari, suzish federatsiyasining ham navbatdan tashqari hisobot-saylov konferensiyasi bo‘lib o‘tdi. Kun tartibidan federatsiyaga yangi rahbar saylash masalasi o‘rin oldi.
Suzish federatsiyasi rahbari lavozimiga O‘zbekiston kasaba uyushmalari federatsiyasi raisi Qudratilla Rafikov nomzodi ilgari surildi. Tadbirda qatnashgan delegatlar ushbu nomzodni bir ovozdan maʼqulladi.
Tadbir davomida federatsiyaning Los Anjeles-2028 yozgi Olimpiya o‘yinlariga tayyorgarlik rejasi batafsil ko‘rib chiqildi.
Izoh (0)