Namanganga Xitoydan 36 ta zamonaviy avtobus keltirildi (video)

Namanganga Xitoyning Yutong kompaniyasi tomonidan ishlab chiqarilgan 36 ta zamonaviy avtobus olib kelindi. Bu haqda “Daryo” muxbiri Azizbek Abduvaliyev xabar bermoqda.

Avtobuslarni foydalanishga topshirish marosimida viloyat hokimi Shavkat Abdurazzoqov, transport vazirining birinchi o‘rinbosari Mamanbiy Omarov, Yutong kompaniyasi mutasaddilari hamda jamoatchilik vakillari ishtirok etdi.

Avtobuslar Namangandagi xususiy korxona tomonidan qozog‘istonlik va xitoylik investorlar ko‘magida keltirildi. Investitsiyalar miqdori 10 million dollarni tashkil etadi.

25 o‘rindiqli avtobus sovitish va isitish vositalari, GPS tizimi, elektron to‘lovni amalga oshirish qurilmasi va videokuzatuv kameralari bilan jihozlangan. Nogironligi bo‘lgan yo‘lovchilar uchun pandus va alohida joy ajratilgan.

Yangi avtobuslar Namangan shahri, Davlatobod va Yangi Namangan tumanlari bo‘ylab harakatlanishi belgilandi. Bundan avval ushbu hududlarda jamoat transporti uchun maxsus yo‘laklar ham tashkil etildi.

Namanganga keltirilgan yangi avtobuslarning ilk yo‘lovchilari viloyat sektor rahbarlari, nuroniylar va OAV vakillari bo‘ldi.

Viloyat transport boshqarmasi boshlig‘i Bahodir Bekxo‘jayevning ma’lum qilishicha, hozirda Namanganga tadbirkorlar tomonidan yana 70 ta shunday avtobus olib kelish yuzasidan muzokaralar olib borilmoqda.