Londonning “Arsenal” klubi Portugaliyaning “Sporting” jamoasi hujumchisi Viktor Dyokereshni safga qo‘shib olishga juda yaqin. Bu haqda mashhur jurnalist Fabritsio Romano o‘zining ijtimoiy tarmoqdagi sahifasida xabar berdi.
Manbaga ko‘ra, 27 yoshli shved futbolchisining agentlari allaqachon Londonga yetib kelgan va transfer bo‘yicha yakuniy muzokaralarni olib bormoqda. Shartnomaga oid masalalar kelishib olingach, Dyokeresh tibbiy ko‘rikdan o‘tish uchun Angliyaga yo‘l oladi.
“Arsenal” ushbu transfer uchun 70 million yevro to‘lashga, shuningdek, qo‘shimcha tarzda 10 million yevro bonus ajratishga tayyor. “Sporting” futbolchini saqlab qolishni istayotgan bo‘lsa-da, Dyokeresh jamoani tark etishni istamoqda. U klub rahbariyati bilan kelishmovchilikka borgan va mavsumoldi yig‘inlarda ishtirok etmayapti.
Eslatib o‘tamiz, Viktor Dyokeresh 2023 yildan beri “Sporting” sharafini himoya qilib kelmoqda. Bu davr ichida u 102 o‘yinda maydonga tushib, 97 ta gol va 28 ta golli uzatmaga mualliflik qilgan. Shuningdek, u Shvetsiya terma jamoasi tarkibida 26 uchrashuvda ishtirok etib, 15 ta gol kiritgan.
Transfermarkt portali ma’lumotlariga ko‘ra, Dyokereshning hozirgi bozor qiymati 75 million yevroga teng.
Izoh (0)