Tashqi ishlar vazirligida VFS Global xalqaro kompaniyasining MDH va Sharqiy Yevropa mamlakatlari bo‘yicha mintaqaviy direktori Sh.Mishra va O‘zbekistondagi vakolatxonasi rahbari T.To‘ychiyev bilan uchrashuv o‘tkazildi.
Keltirilishicha, mamlakat hududlarida VFS Global ofislari tarmog‘ini kengaytirish istiqbollari muhokama qilindi. Jamoaviy guruhlarning arizalari bo‘yicha kompaniya xodimlarining sayyor qabullari mexanizmini ishga tushirishga kelishib olindi.
Ushbu xizmat shakli pullik asosda ko‘rsatiladi hamda chekka hududlardagi ariza beruvchilarga, Toshkent va Samarqand shaharlaridagi markazlarga tashrif buyurmasdan viza yordamini olish imkonini beradi.
Shuningdek, O‘zbekiston fuqarolari uchun respublikada diplomatik vakolatxonalari bo‘lmagan mamlakatlarga (jumladan, Kanada, Argentina, Avstraliya va boshqalar) vizalarni rasmiylashtirish tartib-taomillarini soddalashtirishga alohida eʼtibor qaratilgan.
Akkreditatsiyadan o‘tgan konsulliklar mavjud bo‘lmagan sharoitda vizani rasmiylashtirish qo‘shimcha vaqt va moliyaviy xarajatlarni talab qiladi. Shu munosabat bilan O‘zbekiston tomoni jarayonlarning bir qismini mamlakat hududiga ko‘chirishga, jumladan, VFS Global’ning mahalliy ofislari orqali biometrik maʼlumotlarni topshirish va onlayn suhbat o‘tkazish imkoniyatini ko‘rib chiqishni taklif etdi.
Tomonlar hamkorlikni yanada kengaytirish, qo‘shma tashabbuslarni amalga oshirish va O‘zbekiston fuqarolari uchun viza xizmatlari sifatini oshirishdan manfaatdor ekanliklarini tasdiqlagan.
Prezident O‘zbekistonliklar AQSHga kirishi uchun viza talablarini yengillashtirish choralarini ko‘rishni topshirgan edi. Davlat rahbarining “2025—2026-yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida”gi farmonida belgilanishicha, TIV 3 oy muddatda AQSH fuqarolari uchun O‘zbekistonga 30 kunlik muddatga vizasiz kirish rejimini joriy qilish hamda O‘zbekiston fuqarolariga AQSHga kirish uchun viza talablarini yengillashtirish yuzasidan muzokaralar boshlash va yakuni bo‘yicha taklif kiritishi lozim.
Izoh (0)