Andijon viloyatining Xo‘jaobod tumanida mast fuqaro pichoqlashi oqibatida halok bo‘lgan profilaktika inspektori Abdurasul Abduvaliyev “Jasorat” medali bilan mukofotlandi. Bu haqda viloyat hokimligi matbuot xizmati xabar berdi.
Maʼlum qilinishicha, viloyat hokimi Shuhratbek Abdurahmonov Abdurasul Abduvaliyevga vafotidan so‘ng berilgan “Jasorat” medalini topshirgan.
1-iyul kuni “Yuksalish” mahallasida hudud profilaktika inspektori katta leytenant Abdurasul Abduvaliyev o‘z oila a’zolariga pichoq bilan tahdid qilayotgan mast fuqaroni zararsizlantirayotganida ko‘krak qismidan og‘ir jarohat olgandi. Ko‘rsatilgan yordamga qaramasdan, shifoxonaga olib ketilayotgan vaqtida vafot etgan. Voqea joyidan qochib ketgan 65 yoshli gumonlanuvchi Y.Xolbozorov esa qidiruvga berilgandi.
U 4-iyul kuni soat taxminan 06:30 larda Xo‘jaobod tumanida joylashgan “Yuksalish” mahallasi “So‘qoloq” qabristonidagi makkapoya ichida yashirinib yotgani aniqlangan. Qo‘lga olish jarayonida u o‘zining qorin qismiga pichoq bilan jarohat yetkazgan hamda birinchi tez tibbiy yordam ko‘rsatilib, shifoxonaga olib borilgan.
Hozirda mazkur holat yuzasidan Jinoyat kodeksining 97-moddasi 2-qismi “g” bandi (o‘z xizmat yoki fuqarolik burchini bajarishi munosabati bilan shaxsni qasddan o‘ldirish) bilan jinoyat ishi qo‘zg‘atilgan hamda tergov harakatlari olib borilmoqda.
Jinoyat kodeksiga ko‘ra, o‘z xizmat yoki fuqarolik burchini bajarishi munosabati bilan shaxsni qasddan o‘ldirish 15 yildan 25 yilgacha ozodlikdan mahrum qilish yoki umrbod ozodlikdan mahrum qilish bilan jazolanadi.
Izoh (0)