“Barselona” klubi 17 yoshli hujumchisi Lamin Yamal Xitoyda adidas kompaniyasi bilan hamkorlik doirasidagi reklama tadbirlarining birida o‘zining eng sevimli futbolchisi haqida fikr bildirdi.
Men uchun Messi tarixdagi eng buyuk futbolchi. U maydonda nima qilmasin, har bir harakati, o‘yinidagi barcha jihatlar menga yoqadi. Haqiqatan ham u hayratlanarli darajadagi futbol namoyish etadi, — dedi Yamal Mundo Deportivo nashriga bergan intervyusida.
Yamal hozirda Xitoyning Shanxay shahrida bo‘lib turibdi. U yerda adidas brendi bilan hamkorlikda reklama loyihalarida qatnashdi hamda maktab o‘quvchilari o‘rtasidagi mahalliy futbol turniri finalining faxriy mehmoni sifatida ishtirok etdi.
Ta’kidlash joizki, 13-iyul kuni Lamin Yamal 18 yoshga to‘ladi. Ispaniya matbuotining xabar berishicha, aynan shu kunda “Barselona” klubi rasmiy ravishda Yamalning yangi raqami — 10 raqam ostida o‘ynashini e’lon qiladi. Ushbu raqam klub afsonasi Lionel Messiga, keyinchalik esa uning izdoshi deya qaralgan Ansu Fatiga tegishli edi. Fati yaqinda “Monako” klubiga o‘tdi va shundan so‘ng 10-raqam bo‘sh qolgan.
Izoh (0)