AQSH 1-avgustdan boshlab Qozog‘istondan keladigan tovarlar uchun 25 foizlik boj joriy etadi. Bu haqda prezident Donald Tramp o‘zining Truth Social’dagi sahifasida ma’lum qildi.
Siyosatchi qozog‘istonlik hamkasbi Qosim-Jo‘mart To‘qayevga tegishli maktubni yo‘lladi. Unda Tramp respublika bilan “yanada muvozanatli va adolatli SAVDO” o‘rnatish haqida so‘z yuritgan.
Qozog‘iston bilan savdo aloqalarimizni yillar davomida muhokama qildik. Qozog‘istonning tarif va notarif siyosati hamda savdo to‘siqlari tufayli yuzaga kelgan savdo taqchilliklaridan voz kechishimiz kerakligi haqida xulosaga keldik. Afsuski, bizning munosabatlarimiz o‘zaro manfaatli bo‘lishdan yiroq edi.
2025-yil 1-avgustdan boshlab AQSHga yuboriladigan barcha Qozog‘iston mahsulotlariga, tarmoq tariflaridan tashqari, 25 foizlik bojxona tarifi belgilaymiz. Yuqori tarifdan qochish maqsadida qayta jo‘natilgan tovarlar o‘sha yuqori tarifga tortiladi. 25 foizlik miqdor mamlakatingiz bilan mavjud savdo taqchilligi nomutanosibligini bartaraf etish uchun zarur bo‘lgan miqdordan ancha past.
Agar Qozog‘istondagi kompaniyalar AQSH hududida mahsulot ishlab chiqarishga qaror qilsa, hech qanday tarif qo‘llanmaydi. Bundan tashqari, biz ruxsatnomalarni tez, professional va muntazam ravishda — ya’ni bir necha hafta ichida olishingiz uchun barcha choralarni ko‘ramiz, deyiladi maktubda.
Ta’kidlanishicha, xuddi shunday maktublarni AQSH prezidenti Malayziya (25 foizlik boj), Laos (40 foiz), Janubiy Afrika (30 foiz), Myanma (40 foiz), Yaponiya (25 foiz) va Janubiy Koreya (25 foiz) yetakchilariga ham yo‘llagan.
Izoh (0)