Madridning “Real” klubi yozgi transfer oynasida bir nechta futbolchilar bilan xayrlashishni rejalashtirmoqda. Bu haqda Ispaniyaning Cadena Ser nashri xabar berdi.
Manbaga ko‘ra, jamoani tark etishi mumkin bo‘lgan futbolchilar ro‘yxatida markaziy yarim himoyachi Dani Sebalyos ham bor. Hozircha u bu borada bosh murabbiy Xabi Alonso bilan suhbat o‘tkazmagan, biroq uning “Real”dagi kelajagi noaniq qolmoqda.
Shuningdek, hujumchilar Endrik va yosh iste’dod Gonsalo Garsiyaning ham jamoadan ketishi ehtimoli mavjud. Oldingi chiziqda kuchli raqobat shakllanganligi sababli, klub ularni boshqa jamoalarga ijaraga berish yoki butunlay sotish variantlarini ko‘rib chiqmoqda.
Bundan tashqari, bosh murabbiy Alonso braziliyalik qanot hujumchisi Rodrigo Goesni keyingi mavsum rejalariga kiritmagan. Manbaga ko‘ra, Angliya Premer Ligasining bir nechta jamoalari unga qiziqish bildirmoqda va futbolchining “Real”ni tark etish ehtimoli yuqori. Rodrigo Klublar o‘rtasidagi Jahon chempionatida yetarlicha o‘yin amaliyotiga ega bo‘lmadi. Bu omil uning ketishiga asosiy sabab bo‘lishi kutilmoqda.
Izoh (0)