2025-yilgi Klublar o‘rtasidagi Jahon chempionati 1/8 final bosqichida yana ikki uchrashuv bo‘lib o‘tdi. Madridning “Real” klubi Turinning “Yuventus” jamoasini minimal hisobda mag‘lub etib, chorak final yo‘llanmasini qo‘lga kiritdi. Dortmundning “Borussiya”si esa Meksikaning “Monterrey” jamoasi ustidan ishonchli g‘alabaga erishdi.
Markaziy bahslardan hisoblangan “Real Madrid” va “Yuventus” jamoalari o‘rtasidagi o‘yin AQShning Mayami shahrida joylashgan “Hard Rock” stadionida bo‘lib o‘tdi. Uchrashuvda yagona gol 54-daqiqada kiritildi — “Real” hujumchisi Gonsalo Garsiya raqib darvozasini ishg‘ol qilib, jamoasiga g‘alaba keltirdi. O‘yinning qolgan qismi ham hujumlarga boy tarzda o‘tdi, biroq boshqa gollar kiritilmadi.
Mazkur g‘alaba “Real Madrid”ga musobaqaning chorak final bosqichiga yo‘l ochdi.
Navbatdagi 1/8 final uchrashuvi esa Atlanta shahridagi “Mercedes-Benz” arenasida o‘tkazildi. Unda Germaniyaning “Borussiya Dortmund” jamoasi Meksikaning “Monterrey” klubi bilan kuch sinashdi.
Dortmundliklar o‘yinni faol boshlashdi va 14-daqiqada Serju Grassining aniq zarbasi bilan hisobni ochishdi. Oradan 10 daqiqa o‘tib, Grassining dubli hisobni 2:0 ko‘rinishiga keltirdi.
Ikkinchi bo‘lim boshida “Monterrey” hujumchisi Xerman Berterame javob golini urdi — 2:1. Biroq bu gol meksikaliklar uchun yetarli bo‘lmadi.
Natijada, “Borussiya Dortmund” 2:1 hisobida zafar quchib, chorak finalga yo‘l oldi.
Klublar o‘rtasidagi Jahon chempionati
1/8 final bosqichi
1-iyul, seshanba
“Real Madrid” — “Borussiya D” 1:0
Gol: 1:0 — Garsiya (54)
“Borussiya D” — “Monterrey” 2:1
Gollar: 1:0 — Grassi (14), 2:0 — Grassi (24), 2:1 — Berterame (48)
Izoh (0)