Farg‘ona viloyatida bugungi kunda chiqindilarni tashish xizmati bo‘yicha aholidan jami 2 milliard so‘mdan ortiq haq undirilgani aniqlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.
Ma’lum qilinishicha, 2025-yilda Raqobat qo‘mitasi va uning hududiy boshqarmalariga chiqindi tashish xizmati bo‘yicha fuqarolardan ko‘plab norozilik murojaatlari kelib tushgan. Xususan, Farg‘ona viloyatining Quva tumanidan tushgan o‘ndan ortiq murojaatlar tahlil qilinganda xonadondan chiqindi tashib ketilmayotgani, aholining aniq soniga mos ravishda to‘lov belgilanmasligi va xizmatlarning belgilangan grafikda ko‘rsatilmasligi holatlari aniqlangan. Jumladan, 2 nafar fuqaro istiqomat qilayotgan xonadondan chiqindi tashib ketilmagan va bundan tashqari hisob-kitobda 5 kishi uchun haq undirilgan.
Vazirlar Mahkamasining 2019-yil 6-fevraldagi 95-sonli qarori bilan tasdiqlangan qoidaga asosan xizmat ko‘rsatuvchi tashkilot maishiy chiqindilarni to‘plash va olib chiqib ketish bo‘yicha xizmatlar ko‘rsatishning tartibi va tariflarining o‘zgargani to‘g‘risida ushbu tariflar kuchga kirishidan 15 kun avval xizmat ko‘rsatuvchi tashkilotning stendida, e’lonlar taxtasida e’lonlar osish yo‘li bilan, shuningdek, ommaviy axborot vositalari orqali iste’molchini xabardor qilishga majburligi belgilangan.
Biroq “Tozalik Sanitar Servis” MCHJ tomonidan yangi tariflar aholiga o‘z vaqtida e’lon qilinmagan holda qo‘llangani tufayli 2024–2025 yillar mobaynida Quva tuman filiali tomonidan yuqori tarif qo‘llanishi natijasida 264 million so‘mdan ortiq, Farg‘ona shahar filiali tomonidan 17 million so‘mga yaqin mablag‘lar ortiqcha hisoblangan.
Shuningdek, Quva tumanidagi “Baynalmilal”, “Jalayer”, “Iftixor”, “Katta Qashqar”, “Mustaqillik”, “Namuna”, “Sufi” MFYga Vazirlar Mahkamasining qarori talablari asosida xizmat ko‘rsatilmagani natijasida 1,7 milliard so‘mdan ziyod ortiqcha mablag‘ hisoblangan.
Yuqoridagilardan kelib chiqib, Farg‘ona viloyatida bugungi kunda chiqindilarni tashish xizmatidan aholidan jami 2 milliard so‘mdan ortiq haq undirilgani alomatlari mavjudligi aniqlanib, asossiz undirilgan mablag‘ni iste’molchilarga qaytarish bo‘yicha ko‘rsatma berilgan.
Boshqa viloyatlarda ham ilgari shu kabi holatlar qayd etilgandi. Namangan viloyatida chiqindi tashish xizmati uchun aholidan 18 milliard so‘mdan ortiq pul asossiz olingani aniqlangandi. Surxondaryoda bu xizmat uchun aholidan ortiqcha 3,2 milliard so‘m to‘lov olingandi.
Izoh (0)