Kataloniyaning mashhur “Barselona” klubi so‘nggi yillarda duch kelgan moliyaviy inqirozdan asta-sekin chiqib bormoqda. Ispaniyaning Sport nashri xabariga ko‘ra, klub 2020-yil pandemiya davrida futbolchilarga to‘lanmay qolgan maoshlar bo‘yicha barcha qarzlarini to‘liq yopdi.
Ma’lumotlarga ko‘ra, yakuniy to‘lov miqdori 16 million yevroni tashkil etgan. Bu mablag‘ bir nechta futbolchi va murabbiylarga to‘lab berilgan. Ular orasida Lionel Messi, Filippe Koutinyo, Ronald Kuman hamda boshqa bir qancha sobiq jamoa a’zolari bor.
Eslatib o‘tamiz, Messi “Barselona”ni 2021-yilda tark etgan edi. O‘shanda klub moliyaviy cheklovlar sababli unga yangi shartnoma taklif qila olmagan. Natijada, argentinalik yulduz Parijning “PSJ” klubiga o‘tdi va u yerda ikki mavsum harakat qildi. Keyinchalik esa AQSHning MLS ligasiga yo‘l olib, “Inter Mayami” safiga qo‘shildi. Hozirda Messining “Inter Mayami” bilan amaldagi shartnomasi 2025-yil oxirigacha mo‘ljallangan.
Izoh (0)