Qashqadaryo viloyatining Chiroqchi tumani hokimi Fayzulla Yusupov fuqaroga qo‘l ko‘tardi. Voqea hududdagi kuzatuv kameralariga tushib qolgan.
Videoga izoh beruvchiga ko‘ra, tuman hokimi avvaliga tandirni tepgan va so‘ngra IIB xodimlari yonida turgan fuqaroga tarsaki tushirgan. Holat bo‘yicha boshqa ma’lumot yo‘q.
“Daryo” voqeani aniqlashtirish maqsadida Chiroqchi tumani hokimligi axborot xizmati bilan bog‘landi.
Holat haqida bizda ham aniq ma’lumot yo‘q. Ayni paytda yig‘ilish bo‘lyapti. Hokim bilan muloqot qilib, voqeaga aniqlik kiritib beramiz, dedi “Daryo” jurnalisti bilan suhbatda bo‘lgan mas’ul Sobit Abdunaimov.
Fayzulla Yusupov viloyat Moliya bosh boshqarmasi boshlig‘i lavozimini bajarayotgan paytda xodimini “mol”, “eshak” deya haqoratlab, jamoatchilik e’tiboriga tushgandi. Mazkur audioyozuvda sobiq boshqarma boshlig‘i, ayni kunda hokimlik qilayotgan Yusupovning “O‘zingni o‘zing ossang bo‘lmaydimi?”, “Zamon to‘g‘ri kelganda, peshonangdan otardim”, “Ayollar, ko‘kragingni ochib yurma bu yerda. Hech kim sening ko‘kragingni ko‘raman deb kelayotgani yo‘q, boshqa joyda ochib ko‘rsat”, “Hokimingga chiqaman, qani, bir minutda jazolab bermasin-chi, sendaqa moliya mudirchalarini”, degan gaplari yangragandi. Shundan so‘ng u ogohlantirish olgandi.
“Daryo” ushbu mavzuga qaytadi.
Izoh (0)