Ukraina prezidenti Vladimir Zelenskiy Rossiya bilan muzokaralar o‘tkazish hozircha rejalashtirilmaganini bildirdi. Bu haqda u Rimda bo‘lib o‘tgan Ukrainani tiklash bo‘yicha konferensiyadan so‘ng ma’lum qildi.
Zelenskiyga ko‘ra, Kiyev, Moskva va Vashington o‘rtasidagi to‘liq muzokaralar faqat Istanbulda erishilgan asirlar almashinuvi yakunlangandan keyingina amalga oshishi mumkin.
Ikkinchi uchrashuvda kelishilgan masalalarni oxiriga yetkazishimiz kerak. Ya’ni Istanbulda kelishilgan almashinuvlar yakunlanishi zarur. Shundan keyingina delegatsiyalar uchrashuvga tayyorgarlikni rahbarlar darajasida muhokama qilishi mumkin, degan Ukraina prezidenti.
U urushni haqiqatdan tugatish va tinchlik muzokaralarida sezilarli natijaga erishish uchun aynan prezidentlar darajasidagi uchrashuvga tayyorgarlik muhimligini ta’kidladi.
Aytganimdek, biz har qanday formatga tayyormiz. Biroq eng maqbul variant bu Ukraina—Rossiya—AQSH rahbarlari darajasidagi formatdir. Bunday uchrashuvda faqat so‘zlar emas, balki aniq kafolatlar yangrashi kerak, dedi prezident.
Zelenskiy muzokaralar o‘tkaziladigan joy haqida hozircha gapirishga erta ekanini aytdi. Shu bilan birga, u o‘z hududida uchrashuv o‘tkazish taklifini bergan Vatikanga minnatdorlik bildirdi. Shuningdek, muzokaralarni tashkil etish bo‘yicha Avstriya, Shveysariya va Turkiyadan ham takliflar kelib tushganini ma’lum qildi.
U Rossiya rahbari Vladimir Putinning “urushni cho‘zishga urinayotgani”ni yana bir bor ta’kidladi:
Biz va hamkorlarimizning razvedka ma’lumotlariga ko‘ra, Rossiya bu urushni cho‘zmoqchi. Putin tinchlikka erishish imkoniyatlaridan voz kechmoqda. U urush va qotilliklarga qaram bo‘lib qolgan va faqat kuch bilan to‘xtatilishi mumkin. Shu sabab mudofaamiz yetarlicha kuchli bo‘lishi kerak, degan Zelenskiy.
Ukraina hisob-kitoblariga ko‘ra, kelasi yili Rossiya urushga 300 milliard dollargacha mablag‘ yo‘naltirishi mumkin. Biroq Zelenskiy sanksiyalar bosimi Kremlning bu urushni moliyalashtirish imkoniyatlarini to‘xtatishiga ishonadi.
Istanbuldagi tinchlik muzokaralari
2025-yil 16-may kuni Istanbulda Rossiya va Ukraina delegatsiyalari Turkiya ishtirokida uchrashuv o‘tkazgan. Bu 2022-yildan beri ikki davlat o‘rtasidagi ilk to‘g‘ridan to‘g‘ri muzokara bo‘lgan. Mazkur uchrashuv oldidan Putin to‘g‘ridan to‘g‘ri muzokaralar o‘tkazishni taklif qilgan.
Bunga javoban Zelenskiy Rossiya bilan muzokaralarga tayyorligini tasdiqlagan va 15-may kuni Putinni Turkiyada shaxsan kutishini aytgan. Ukraina prezidenti bergan va’dasi ustidan chiqib, muzokaralar uchun Istanbulga tashrif buyurgan. Biroq Rossiya prezidenti muzokaralar uchun Turkiyaga bormagan.
28-may kuni Ukraina prezidenti Vladimir Zelenskiy AQSH prezidenti Donald Tramp ishtirokida Putin bilan uchrashishga tayyorligini bildirgan. Biroq iyul oyiga kelib, bunday uchrashuv hali amalga oshgani yo‘q.
2-iyun kuni Istanbulda muzokaralarning ikkinchi raundi bo‘lib o‘tgan. Uchrashuvda asirlar va halok bo‘lgan harbiylarning jasadlarini almashish bo‘yicha kelishuvga erishilgan. Turkiya va Ukraina tashqi ishlar vazirlari prezidentlar darajasidagi uchrashuv zarurligini ta’kidlagandi.
Izoh (0)