Ispaniyaning Madrid shahri 2030-yilda bo‘lib o‘tadigan futbol bo‘yicha Jahon chempionati final uchrashuviga mezbonlik qilishi mumkin. Marca nashrining yozishicha, “Santiago Bernabeu” stadioni final o‘yini uchun asosiy nomzod sifatida tanlangan va bu borada FIFA hamda “Real Madrid” o‘rtasida kelishuvga erishilgan. Bu rasmiy tarzda e’lon qilinmagan bo‘lsa-da, vaziyatdan xabardor manbalar bitim allaqachon imzolangani haqida xabar bermoqda.
2030-yilgi mundial tarixiy ahamiyat kasb etadi — turnir Ispaniya, Portugaliya va Marokash tomonidan birgalikda tashkil etiladi. Ispaniyaning A-Korunya, Barselona, Bilbao, Las-Palmas, Madrid, Malaga, San-Sebastyan, Sevilya va Saragosa kabi shaharlariga mezbonlik huquqi berilgan. Biroq final uchrashuvi aynan qaysi arenada o‘tishi borasida hozirgacha rasmiy qaror mavjud emas edi.
FIFA va “Real Madrid” o‘rtasidagi ko‘p yillik ijobiy hamkorlik ushbu qarorning qabul qilinishida muhim omil bo‘ldi. Bugungi kunda to‘liq modernizatsiyadan o‘tgan “Santiago Bernabeu” stadioni yirik xalqaro uchrashuvlar va tadbirlarni o‘tkazish uchun to‘liq tayyor bo‘lib, uning infratuzilmasi FIFA talablariga to‘la javob beradi.
Avvalroq “Barselona” klubi ham o‘zining yangilangan “Spotify Kamp Nou” stadionida finalni o‘tkazish taklifi bilan chiqqan edi. Klub vitse-prezidenti Yelena Fort bu borada shunday degan:
Hamma o‘z imkoniyatidan foydalanishga haqli. Shu bois “Kamp Nou” ham Jahon chempionati finalini o‘tkazishga loyiq stadion.
Biroq “Kamp Nou” rekonstruksiyasi loyihasida yuzaga kelgan kechikishlar va noaniqliklar tufayli “Barselona”ning arizasi e’tiborsiz qoldirilgan.
FIFA uchun ishonchli infratuzilma va to‘liq tayyorgarlik darajasi asosiy mezonlardan biri hisoblanadi. Shu bois, 2030-yilgi Jahon chempionatining eng muhim o‘yini — final uchrashuvi Madrid markazida joylashgan zamonaviy va tayyor “Santiago Bernabeu” stadionida o‘tkazilishi kutilmoqda.
Izoh (0)