Pensiya va nafaqalar oshdi. Yangi to‘lovlar miqdori qanday bo‘ladi?

Prezident farmoni bilan 2024-yil 1-sentyabrdan boshlab O‘zbekistonda pensiya va nafaqalar miqdori 15 foizga oshirilmoqda. “Daryo” Pensiya jamg‘armasi hamda Ijtimoiy himoya milliy agentligi bilan bog‘lanib, pensiya va nafaqalarning yangi miqdorlari to‘g‘risida maʼlumot oldi.

Pensiyalarning yangi miqdorlari

Sentyabr oyidan mamlakatda pensiyani hisoblashning bazaviy miqdori amaldagi 372 000 so‘mdan 428 000 so‘mga oshirilmoqda.

Yoshga doir eng kam pensiya miqdori oyiga amaldagi 725 000 so‘mdan 834 000 so‘mga ko‘tarildi.

Nogironlik pensiyalari, jumladan ish staji to‘liq bo‘lmagan chog‘dagi nogironlik pensiyasining eng kam miqdori — oyiga 800 000 so‘mdan 920 000 so‘mga yetkazildi. 

Boquvchisini yo‘qotganlik pensiyasi oluvchilarning bir nafar mehnatga qobiliyatsiz oila aʼzosi uchun pensiyaning eng kam miqdori — oyiga 648 000 ming so‘mdan 745 000 so‘mga yetkazildi. Keyingi har bir mehnatga qobiliyatsiz oila aʼzosi uchun amaldagi tartibga muvofiq pensiya to‘lanadi.

Kelasi oydan belgilangan yoshga doir eng kam pensiya miqdoridan (834 000 so‘mdan) 920 000 so‘mgacha pensiya oluvchilarning yoshga doir pensiyalari miqdori — oyiga 800 000 so‘mdan 920 000 so‘mga oshirildi.

Ish staji to‘liq bo‘lmagan chog‘dagi yoshga doir pensiyaning eng kam miqdori qo‘shimcha to‘lovni hisobga olgan holda — oyiga 648 000 so‘mdan 745 000 so‘mga yetkazildi.

Shuningdek, 1941–1945-yillardagi urush oqibatida nogiron bo‘lgan shaxslar va uning qatnashchilari, shuningdek, fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan shaxslarning eng kam pensiya miqdori ustamalarni inobatga olgan holda — oyiga 3 527 000 so‘mdan 4 056 000 so‘mga oshirildi.

Nafaqalar yangi miqdorlari

Ijtimoiy himoya milliy agentligining maʼlum qilishicha, 1-sentyabrdan yoshga doir nafaqalar amaldagi 648 000 so‘mdan 745 000 so‘mga oshiriladi.

Kelasi oydan I guruh nogironlik nafaqasi oyiga 1 027 000 so‘m (amalda 893 000 so‘m), II guruh nogironlik nafaqasi 920 000 so‘mga (amalda 800 000 so‘m) yetadi.

O‘z navbatida mamlakatda boquvchisini yo‘qotganlik nafaqasi miqdori hozirgi 648 000 so‘mdan 745 000 so‘mga oshiriladi.

Nogironligi bo‘lgan 18 yoshgacha bolalar nafaqasi esa 800 000 so‘mdan 920 000 so‘mga ko‘tariladi.

Shu bilan birga, sentyabrdan parvarishlash nafaqasi — 745 000 so‘m (amalda 648 000 so‘m), bola tug‘ilganda beriladigan bir martalik nafaqa (“suyunchi puli”) 811 965 so‘mdan (amalda 738 000 so‘m) to‘lana boshlaydi.

Dafn marosimi nafaqasi esa amaldagi 1 488 000 so‘mdan 1712 000 so‘mga oshiriladi.

Qo‘shimcha qilinishicha, kelasi oydan boquvchisini yo‘qotganlik nafaqasi oluvchilarning bir nafar mehnatga qobiliyatsiz oila aʼzosi uchun nafaqa miqdori oyiga 745 000 so‘mni tashkil etadi. Keyingi har bir mehnatga qobiliyatsiz oila aʼzosi uchun 244 000 so‘mdan qo‘shiladi.