Qirg‘izistonda go‘sht narxlari davlat tomonidan tartibga solinadi. Tegishli qaror suv resurslari, qishloq xo‘jaligi va qayta ishlash sanoati vaziri Bakit Toroboyev raisligida o‘tgan yig‘ilishda qabul qilindi. Bu haqda 24.kg nashri xabar berdi.
Rasmiylarga ko‘ra, ushbu chora-tadbirlar go‘sht narxining keskin oshishining oldini olish, chorva mollarining chegaradan noqonuniy olib chiqilishiga qarshi nazoratni kuchaytirish, chorva eksportiga miqdoriy cheklovlar joriy etish uchun amalga oshirilmoqda.
Antimonopoliya xizmatiga mamlakat bo‘ylab go‘sht narxlarini doimiy monitoring qilish va tahlil etish topshirilgan. Xususiy tadbirkorlar ustidan ham veterinariya-sanitariya nazorati kuchaytiriladi. Chegaradagi kontrabanda holatlarining oldini olish uchun aniq chora-tadbirlar ko‘riladi.
Qirg‘izistonda go‘sht narxlari qanday?
Milliy statistika qo‘mitasi ma’lumotlariga ko‘ra, Qirg‘izistonda go‘sht narxlari oshishda davom etmoqda. 29-iyul holatiga ko‘ra, mol go‘shtining eng yuqori narxi Norin shahrida qayd etilgan. Bu yerda 1 kilo mol go‘shti o‘rtacha 700 som (taxminan 100 ming so‘m) atrofida sotilmoqda.
Qo‘y go‘shti eng qimmat bo‘lgan hududlar — Norin va Razzaqov, bu yerda ham narx 1 kilo uchun 700 somni tashkil etadi. Ot go‘shti esa O‘zgan va To‘qmoq shaharlarida qimmat — o‘rtacha 650 som (taxminan 94 ming so‘m) dan sotilmoqda.
O‘zbekistonda 2025-yil iyun oyida yillik inflyatsiya darajasi 8,7 foizni tashkil etdi. Bu davrda qo‘y go‘shti 32 foizga, mol go‘shti esa 30,5 foizga qimmatlashdi.
Izoh (0)