Telegram messenjeridagi kanallarda “Hamma o‘zining viloyatida taksi qiladigan jarayonga ham yetib kelibmiz”, deb nomlangan video tarqaldi. Unda aytilishicha, taksi haydovchilariga litsenziya beruvchi tashkilot endilikda har bir haydovchiga litsenziya berishda hududni hisobga olmoqda.
Xullas, ko‘pchik hozir “Litsenziya olamiz, Toshkentda ishlaymiz”, desa, “otmen” beryapti. Haydovchi litsenziya oladigan bo‘lsa o‘zining hududida ishlaydigan qilib qo‘yishibdi. Misol uchun 01 — Toshkent nomeri. Ular Toshkentda ishlaydi. Andijonliklar Andijonda, qoraqalpog‘istonliklar Qoraqalpog‘istonda, qashqadaryoliklar Qashqadaryoda, deydi video muallifi.
“Daryo” mazkur holatga aniqlik kiritish maqsadida Transport vazirligi axborot xizmati bilan bog‘landi.
Masʼul vazirlik axborot xizmati rahbari Navro‘z Ashurmatov mazkur xabarni tasdiqladi va ayni kunda jarayon amalga oshirilayotganini aytdi.
Bu tartib kecha yoki bugun paydo bo‘lib qolmagan. 2011-yilda aynan mana shu yo‘nalishli taksilar faoliyatini tartibga soluvchi 139-sonli qaror chiqarilgan. O‘sha qaror bilan tasdiqlangan nizomda yo‘nalishli taksilar uchun yagona tanish belgilari va ularning faoliyat yuritishi uchun qo‘yilgan talablar bor. O‘sha nizomning 5-bob 9-bandida haydovchi yo‘lovchilarni yo‘nalishsiz taksida tashishni litsenziya kartochkasida belgilangan hududda amalga oshiriladi deb yozilgan. Bu qaror hozir o‘zining kuchini yo‘qotgan. Mazkur qaror o‘rnini bosuvchi 2025-yilda chiqqan qarorga ko‘ra, haydovchining o‘z hududida, yaʼni litsenziya kartochkasida ko‘rsatilgan hududda faoliyat olib borishi belgilab qo‘yildi.
Yaʼni haydovchi faoliyatini o‘sha litsenziya varaqasida ko‘rsatilgan hudud va unga tutash hududda olib boradi. Masalan Toshkent shahrida ro‘yxatdan o‘tgan 01 kod bilan boshlanuvchi davlat raqamli transport vositasi Toshkent shahri, Toshkent viloyati va Sirdaryo viloyati hududida taksichilik faoliyati bilan shug‘ullanishi mumkin. Xuddi shuningdek, viloyatlarniki ham xuddi shunaqa bo‘ladi, deydi vazirlik axborot xizmati rahbari Navro‘z Ashurmatov.
Izoh (0)