Osiyo taraqqiyot banki (OTB) O‘zbekistonga homilador ayollar va ularning yangi tug‘ilgan chaqaloqlari uchun perinatal sog‘liqni saqlash xizmatlarini yaxshilashga ko‘maklashish uchun 100 million dollar miqdorida imtiyozli kredit ajratishni maʼqulladi.
Bankning Markaziy va G‘arbiy Osiyo bo‘yicha bosh direktori Yevgeniy Jukovga ko‘ra, OTB O‘zbekistonda ayollar va bolalar salomatligini muhofaza qilish, onalar va neonatal o‘limni kamaytirish maqsadida O‘zbekistonda yuqori sifatli perinatal tibbiy xizmatlar ko‘rsatish bo‘yicha hukumat majburiyatini qo‘llab-quvvatlaydi.
Integratsiyalashgan perinatal yordam loyihasi butun mamlakat bo‘ylab qariyb 230 perinatal markazni modernizatsiya qilish uchun ajratilgan. Shuningdek, ularni zamonaviy energiya tejovchi tibbiy asbob-uskunalar, yangilangan klinik standartlar va protokollar, tibbiyot xodimlarining salohiyati va sifatini taʼminlash mexanizmlari bilan jihozlashda yordam beradi.
Loyiha perinatal yo‘llanma tizimini takomillashtiradi va tez yordam guruhlarini kuchaytirish hamda sog‘liq uchun xavflarni erta aniqlash va homiladorlik monitoringi uchun bemorlarning elektron qaydlarini joriy etish orqali tegishli va o‘z vaqtida hayotni saqlab qoluvchi yordamdan foydalanish imkoniyatlarini kengaytiradi.
O‘zbekistonda onalar o‘limi 2010-yilda har 100 ming tirik tug‘ilgan chaqaloqqa 38 o‘limdan 2020-yilda 30 o‘limgacha yaxshilangan bo‘lsa-da, Yevropa va Markaziy Osiyodagi o‘rtacha ko‘rsatkichdan yuqoriligicha qolmoqda.
Eslatib o‘tamiz, o‘tgan yili sentyabr oxirlarida Osiyo taraqqiyot banki (OTB) O‘zbekistonning 2023 va 2024-yil uchun iqtisodiy o‘sish prognozini yaxshilagandi. Undan avvalroq esa OTB O‘zbekiston energiya taqsimlash tizimini raqamlashtirishga 200 mln dollar qarz ajratishi ma’lum bo‘lgan edi.
Izoh (0)