Erdo‘g‘on Ozarbayjonga safarini bekor qilib, futbol uchun Germaniyaga boradi — OAV

Turkiya prezidenti Rajab Toyyib Erdo‘g‘on Ozarbayjonda bo‘lib o‘tadigan Turkiy davlatlar tashkiloti sammitidagi ishtirokini bekor qildi. 

Ma’lum bo‘lishicha, u 6-iyul kuni Berlinda bo‘lib o‘tadigan Turkiya va Niderlandiya terma jamoalari o‘rtasidagi futbol bo‘yicha Yevropa chempionatining chorak final o‘yiniga shaxsan tashrif buyurish niyatida.

OAVga ko‘ra, mazkur qaror Turkiya terma jamoasi futbolchisi Merih Demiral bilan bog‘liq mojaroga ham aloqador bo‘lib, unga nisbatan Yevropa futbol uyushmalari ittifoqi (UEFA) tergov boshlagan. Bunga futbolchining turk millatchilarining “Kulrang bo‘rilar” harakatiga ishorasi sabab bo‘lgani aytilmoqda.

Telekanalning qayd etishicha, Erdo‘g‘on Germaniyaga ushbu voqeadan keyin “turk fuqarolarining ruhiyatini ko‘tarish va ular bilan birga ekanligini bildirish” uchun tashrif buyuradi. Turkiya prezidentining rejalari haqida hozircha rasmiy bayonotlar berilmagan.

Avvalroq Turkiya TIV Germaniyaning Anqaradagi elchisi Yurgen Shulsni UEFA tomonidan Demiralga nisbatan boshlangan intizomiy tekshiruv tufayli chaqirtirgan edi. Turkiya TIV UEFA tomonidan olib borilgan ushbu tergovga yo‘l qo‘yilmasligini e’lon qilgan va Germaniya rasmiylarining bunga munosabatini “siyosiy va ksenofobik” deb atagan.