Klublar o‘rtasidagi Jahon chempionatining 3-turidan o‘rin olgan yana ikki uchrashuv bo‘lib o‘tdi. Musobaqaning G guruhi doirasidagi so‘nggi ikki bahs — “Yuventus” – “Manchester Siti” hamda “Vidad” – “Al-Ayn” jamoalari o‘rtasida kechdi.
AQShning Orlando shahridagi “Kemping Uorld” stadionida Angliya vakili “Manchester Siti” va Italiya klubi “Yuventus” to‘qnash keldi. Gollarga boy o‘yinda “shaharliklar” 5:2 hisobida ishonchli g‘alabaga erishdi.
Hisob 9-daqiqada ochildi — “Siti” a’zosi Jeremi Doku chiroyli gol urib, jamoasini oldinga olib chiqdi. Oradan ikki daqiqa o‘tib, “Yuventus” yarim himoyachisi Tyun Kopmeynerts hisobni tenglashtirdi. 26-daqiqada esa turinliklar himoyachisi Per Kalulu avtogol muallifiga aylandi — “Siti” yana oldinga chiqdi.
Ikkinchi bo‘limda “Manchester Siti” to‘liq ustunlik qildi. 52-daqiqada Erling Holand, 69-daqiqada Fil Foden va 76-daqiqada Savinyo tomonidan urilgan gollar jamoa ustunligini mustahkamladi. “Yuventus” safida esa Dushan Vlahovich hisobni qisqartirgan yagona futbolchi bo‘ldi — 5:2.
Ushbu natijadan so‘ng “Manchester Siti” guruh bosqichini 9 ochko bilan yakunlab, 1-o‘rinni egalladi va 1/8 final yo‘llanmasini qo‘lga kiritdi. “Yuventus” esa 6 ochko bilan 2-o‘rinni egallab, keyingi bosqichga yo‘l oldi.
G guruhi doirasidagi yana bir uchrashuv Vashington shahridagi “Audi Fild” stadionida bo‘lib o‘tdi. Unda Marokashning “Vidad” klubi BAA vakili “Al-Ayn”ga qarshi maydonga tushdi. Uchrashuvda 2:1 hisobida amirliklar jamoasi g‘alaba qozondi.
Uchrashuvning 4-daqiqasida “Vidad” futbolchisi Kassius Maylula hisobni ochdi. 45+1-daqiqada “Al-Ayn” hujumchisi Kojo Laba penaltini aniq amalga oshirib, hisobni tenglashtirdi. 50-daqiqada yarim himoyachi Kako tomonidan urilgan gol BAA klubiga 2:1 hisobida g‘alaba olib keldi.
Shunga qaramay, “Al-Ayn” guruh bosqichini 3 ochko bilan yakunlab, 3-o‘rinda qoldi va turnir bilan xayrlashdi. “Vidad” esa birorta ham ochko to‘play olmadi va so‘nggi pog‘onani egalladi.
Klublar o‘rtasidagi Jahon chempionati — 3-tur
G guruhi
“Yuventus” — “Manchester Siti” 2:5
Gollar: 0:1 — Doku (9), 1:1 — Kompeyners (11), 1:2 — Kalulu (26, avtogol), 1:3 — Holand (52), 1:4 — Foden (69), 1:5 — Savinyo (75), 2:5 — Vlahovich (84)
“Vidad” — “Al-Ayn” 1:2
Gollar: 1:1 — Maylulu (4), 1:1 — Laba (45+1, penalti), 1:2 — Kaku (50)
Izoh (0)