2025-yilning o‘tgan davri mobaynida O‘zbekiston hududida 13 ming 701 nafar haydovchi avtomobilini mast holda boshqargan. Bu haqda 13-iyun kuni Davlat yo‘l harakati xavfsizligi xizmati masʼullari tomonidan tashkil etilgan press-turda maʼlum qilindi.
Tadbirda taʼkidlanishicha, 2025-yilning o‘tgan davri mobaynida haydovchilar tomonidan 855 ming 918 ta qo‘pol turdagi qoidabuzarliklar sodir etilgan. Shundan 125 ming 569 ta holatda haydovchilar qarama-qarshi bo‘lakda harakatlanish huquqbuzarligini sodir etgan bo‘lsa, 209 ming 374 ta holatda ular tegishli hujjatlarsiz avtomashina boshqarishda ayblangan.
Shuningdek, 13 ming 701 nafar haydovchi mast holda avtomashina boshqargan bo‘lib, har bir haydovchi BHMning 40 baravari miqdorida jarimaga tortilgan, 3 yilgacha bo‘lgan muddatga haydovchilik huquqidan mahrum etilgan. 155 ta “yo‘l bezoriligi” huquqbuzarligini sodir etganlarga ham haydovchilik huquqidan mahrum etish jazolari qo‘llanilgan, deyiladi masʼullar bergan maʼlumotda.
Aniqlanishicha, yil boshidan shu kunga qadar 64 ta holatda YPX xodimiga pora berishga urinish holati ro‘y bergan. Huquqbuzarlarga nisbatan Jinoyat kodeksining 211-moddasi bilan jinoyat ishlari qo‘zg‘atilgan.
Izoh (0)