Amerika Qo‘shma Shtatlari prezidenti Donald Tramp 4-iyun kuni xorijlik talabalarning Garvard universitetiga o‘qishga kirishiga to‘sqinlik qiluvchi qonunni imzoladi. Bu haqda Euronews xabar berdi.
Imzolangan farmoyishda Tramp Garvard xorijlik talabalarni qabul qilishda davom etishi milliy xavfsizlikka tahdid solishini aytgan.
“Chet el fuqarolarining AQSHga kirishi mamlakat manfaatlariga zarar yetkazadi. Mening fikrimcha, Garvardning xatti-harakatlari uni chet ellik talabalar va tadqiqotchilar uchun nomaqbul joyga aylantirdi”, deb yozgan Tramp buyruqda.
Bunga Oq uyning universitet bilan adovatining yanada kuchayishi sifatida qaralmoqda. Federal sud o‘tgan hafta Ichki xavfsizlik vazirligiga xalqaro talabalarni Garvardda o‘qishdan chetlatishni taqiqlagandi.
Garvard 4-iyunga o‘tar kechasi bergan bayonotida xorijlik talabalarini himoya qilishda davom etishini aytgandi. Bu qarama-qarshilik Garvardning federal hukumat tomonidan qo‘yilgan bir qator talablarga bo‘ysunishdan bosh tortgani bilan bog‘liq.
Garvardda tahsil olayotgan xorijlik talabalar hozirda 6800 ga yaqin. Trampning aytishicha, AQSH davlat kotibi Marko Rubio ularning vizalari bekor qilinishi yoki bekor qilinmasligini hal qiladi.
Yangi buyruq 6 oyga mo‘ljallangan. Shuningdek, Tramp ma’muriyati buyruqni yangilash huquqini o‘zida saqlab qoladi va bu borada 90 kun ichida qaror qabul qiladi.
Izoh (0)