Toshkent shahrida “O‘zbekiston—Shvetsiya: onkologik yordam sohasida hamkorlik va tajriba almashish” mavzusida davra suhbati bo‘lib o‘tdi, deb xabar bermoqda “Dunyo” axborot agentligi.
IV Xalqaro farmatsevtika forumi doirasida gibrid formatda o‘tkazilgan tadbir O‘zbekistonning Shvetsiyadagi elchixonasi va Toshkentdagi Shvetsiya Savdo va investisiyalar kengashi (Business Sweden) hamkorligida tashkil etildi.
Unda ikki mamlakatning yetakchi ekspert va mutaxassislari, jumladan, O‘zbekiston Sog‘liqni saqlash vazirligi, “O‘zfarmsanoat” uyushmasi, Karolina instituti, Shvetsiya dori-darmon agentligi, AstraZeneca, Vision Zero Cancer va boshqa kompaniyalar mutasaddilari ishtirok etdi. Tadbir doirasida ikki mamlakat sog‘liqni saqlash va farmatsevtika tizimlarini rivojlantirish uchun yaratilgan imkoniyatlar bo‘yicha taqdimot o‘tkazildi.
Muhokamalarda onkologiya va farmatsevtika sohasidagi hamkorlik istiqbollari, yangi loyihalarni ishlab chiqish, tajriba almashish va qo‘shma tadqiqotlar o‘tkazish masalalari ko‘rib chiqildi. Shuningdek, erta tashxis qo‘yish, davolashning innovatsion usullarini joriy etish, skrining tizimini rivojlantirish va onkologik yordam sifatini oshirish masalalariga e’tibor qaratildi.
Tashkilotchilarga ko‘ra, mazkur davra suhbati tibbiyot sohasida O‘zbekiston—Shvetsiya hamkorligini mustahkamlash va onkologik kasalliklarga chalingan bemorlar uchun tibbiy yordam ko‘rsatish sifatini yaxshilash yo‘lidagi muhim qadam bo‘ldi.
May oyining oxirlarida Qozog‘iston va O‘zbekiston birgalikda bolalar saratoni bo‘yicha akademik markaz tashkil qilishi xabar qilingandi. Ikki davlat sog‘liqni saqlash vazirlari tibbiy xizmatlar sifatini oshirish, tibbiy yordam ko‘rsatishda tajriba almashish, birlamchi tibbiy-sanitariya yordami bo‘yicha mamlakatlar koalitsiyasi doirasida o‘zaro hamkorlik, shuningdek, Orolbo‘yi aholisi salomatligiga ta’sir etuvchi ekologik omillarni kompleks o‘rganishga qaratilgan qo‘shma ilmiy loyihalarni muhokama qilgandi.
“O‘zbekiston-2030” strategiyasida onkologik kasalliklar sababli erta o‘limni 2,5 barobarga qisqartirish vazifasi belgilangan.
Izoh (0)