O‘zbekiston terma jamoasi va Italiyaning “Roma” klubi hujumchisi Eldor Shomurodov yaqin orada rimliklar safini tark etishi mumkin. Romaforever nashrining xabariga ko‘ra, unga A Seriyaning boshqa bir klubi — “Kremoneze” jiddiy qiziqish bildirmoqda.
Avvalroq ommaviy axborot vositalarida Shomurodovga bir nechta klublar tomonidan jiddiy qiziqish bo‘layotgani haqida xabarlar tarqalgan edi. Xususan, Fransiyaning “Renn” hamda Turkiyaning “Istanbul Bashakshehir” klublari o‘zbekistonlik futbolchini o‘z safiga qo‘shib olish niyatida.
Romaforever nashrining yozishicha, “Kremoneze” A Seriyada qatnashish huquqini qo‘lga kiritgani sababli, Shomurodov transferi uchun kurashga qo‘shilgan.
Yana bir nashr — Sportitalia ma’lumotiga ko‘ra, “Kremoneze” Eldor Shomurodovni qo‘lga kiritish borasida aniq va jiddiy harakatlarni boshlab yuborgan. Klub A Seriyadagi o‘z o‘rnini saqlab qolish uchun tarkibni kuchaytirishga qat’iy bel bog‘lagan va Shomurodovni hujum chizig‘ini mustahkamlash uchun ideal nomzod sifatida ko‘rmoqda.
“Roma” klubi esa Shomurodovni sotishga qarshi emas. Buning sababi — klub 30-iyungacha ayrim futbolchilarni transfer qilib, moliyaviy balansni tiklashdan iborat. Bu UEFA bilan tuzilgan “do‘stona kelishuv” doirasidagi shartlar bilan bog‘liq. Sababi, bir necha yil avval “bo‘rilar” moliyaviy feyr-pley talablarini buzgan edi. Klubni tark etishi mumkin bo‘lgan asosiy nomlardan biri aynan Eldor Shomurodov sanalmoqda. Rimliklar o‘zbekistonlik hujumchini taxminan 7 million yevroga transfer qilishni rejalashtirmoqda.
Eslatib o‘tamiz, Eldor Shomurodov o‘tgan mavsum turli musobaqalar doirasida 37 o‘yinda maydonga tushib, 7 ta gol urdi va 5 ta golli uzatma amalga oshirdi. Uning “Roma” klubi bilan shartnomasi 2026-yilning yoziga qadar amal qiladi. Transfermarkt portali ma’lumotiga ko‘ra, futbolchining hozirgi transfer qiymati 5 million yevroga teng.
Izoh (0)