Birlashgan Millatlar Tashkiloti dunyo bo‘ylab 2023-yilda giyohvand moddalarni iste’mol qiluvchilar soni 316 million kishiga yetganini ma’lum qildi. Bu haqda tashkilotning Giyohvand moddalarni nazorat qilish va jinoyatchilikning oldini olish boshqarmasi xabar berdi.
Ma’lum qilinishicha, mazkur ko‘rsatkich 2022-yilda 292 millionni tashkil etgan. Kannabis hali ham eng keng tarqalgan giyohvand modda bo‘lib qolmoqda. Uni 244 million kishi iste’mol qiladi. Undan keyingi o‘rinlarni opioidlar (61 mln), amfetaminlar (30,7 mln), kokain (25 mln) va ekstazi (21 mln) egallaydi.
Kokain savdosining tez sur’atlar bilan o‘sib borayotgani BMT ekspertlarini alohida xavotirga solmoqda. Ushbu giyohvandlik vositasini noqonuniy ishlab chiqarish 2023-yilda 3708 tonnagacha oshgan. Bu 2022-yilga nisbatan 34 foizga ko‘pdir. So‘nggi o‘n yillikda kokain iste’mol qiluvchilar soni 8 millionga oshgan.
Uyushgan narkotrafik guruhlari o‘z maqsadlari yo‘lida jahon inqirozlaridan foydalanmoqda va aholining zaif guruhlarini nishonga olmoqda, deydi boshqarma ijrochi direktori Gada Vali.
U xalqaro hamjamiyatni jinoiy tarmoqlarga qarshi yanada faolroq kurashishga chaqirmoqda. Narkokartellar o‘rtasidagi keskin raqobat endi Lotin Amerikasi bilan cheklanib qolmayotgani, balki tobora ko‘proq Afrika, Osiyo va Yevropani qamrab olayotgani ta’kidlanmoqda.
Giyohvand moddalar iste’mol qilish oqibatida birgina 2021-yilning o‘zida yarim millionga yaqin o‘lim qayd etilgan. 28 million sog‘lom yashalishi mumkin bo‘lgan yil yo‘qotilgan. 2023-yilda giyohvand moddalarni iste’mol qilish bilan bog‘liq kasalliklarga chalingan har 12 kishidan atigi bittasi zarur davolanishni olgan.
Izoh (0)