Klublar o‘rtasidagi Jahon chempionatining 3-turidan o‘rin olgan so‘nggi ikki uchrashuv bo‘lib o‘tdi. Musobaqaning H guruhi doirasidagi navbatdagi bahslar — “Zalsburg” – “Real Madrid” hamda “Al-Hilol” – “Pachuka” jamoalari o‘rtasida kechdi.
Filadelfiya shahridagi “Linkoln Faynenshal Fild” stadionida o‘tgan so‘nggi tur uchrashuvida “Real Madrid” Avstriyaning “Zalsburg” jamoasiga qarshi maydonga tushdi. O‘yinda “qaymoqranglilar” 3:0 hisobidagi yirik g‘alabani qo‘lga kiritib, 1/8 final yo‘llanmasini qo‘lga kiritdi.
Uchrashuvdagi hisob 40-daqiqada Vinisius Junior tomonidan ochildi. Bo‘lim yakuniga yaqin urugvaylik yarim himoyachi Federiko Valverde “Real”ning ikkinchi golini urdi. 84-daqiqada esa Gonsalo Garsiya gol urib, uchrashuv taqdiriga nuqta qo‘ydi — 3:0.
Mazkur g‘alabadan so‘ng “Real Madrid” 7 ochko jamg‘arib, guruhda 1-o‘rinni egalladi va pley-off bosqichiga yo‘l oldi. “Zalsburg” esa 4 ochko bilan 3-o‘rinda qolib, musobaqani tark etdi.
H guruhi doirasidagi yana bir bahs Tennessi shtatining Neshvill shahridagi “GEODIS Park” stadionida bo‘lib o‘tdi. Unda Saudiya Arabistonining “Al-Hilol” klubi Meksikaning “Pachuka” jamoasiga qarshi maydonga tushib, 2:0 hisobida g‘alaba qozondi.
Bahsdagi hisob 22-daqiqada Salem Al-Davsari tomonidan ochgan bo‘lsa, ikkinchi bo‘lim oxirida Markos Leonardo ikkinchi golni urib, “Al-Hilol”ga muhim g‘alabani taqdim etdi.
Ushbu natijadan so‘ng riyodliklar 5 ochko jamg‘arib, “Zalsburg”ni ortda qoldirdi. Ular guruhda 2-o‘rinni egallab, o‘z tarixida ilk bor Klublar o‘rtasidagi Jahon chempionatining 1/8 final bosqichiga yo‘l oldi. “Pachuka” hisobida esa ochko mavjud emas.
Klublar o‘rtasidagi Jahon chempionati — 3-tur
H guruhi
“Zalsburg” — “Real Madrid” 0:3
Gollar: 0:1 — Vinisius (40), 0:2 — Valverde (45+3), 0:3 — Garsiya (84).
“Al-Hilol” — “Pachuka” 2:0
Gollar: 1:0 — Davsari (22), 2:0 — Leonardo (90+5)
Izoh (0)