Kataloniyaning “Barselona” klubi Daniyaning “Kopengagen” jamoasida to‘p surayotgan shvetsiyalik iqtidorli futbolchi Runi Barjini o‘z safiga qo‘shib olish arafasida turibdi. Bu haqda taniqli futbol insayderi Fabrisio Romano xabar berdi.
Manbaga ko‘ra, muzokaralar so‘nggi bosqichga kirgan, qolgan tafsilotlar esa yaqin kunlarda hal etilishi kutilmoqda. Shved futbolchisi iyul oyida “Barselona” safiga qo‘shilishi mumkin.
Avvalroq Barjining agenti Kataloniyaga tashrif buyurgani va klub rahbariyati bilan muzokaralar o‘tkazgani haqida ma’lumotlar tarqalgan edi. Ayni paytda “ko‘k-anorranglilar” futbolchini ikki xil yo‘l bilan tarkibga qo‘shish masalasini ko‘rib chiqmoqda: uni 2–3 million yevro evaziga hozir sotib olish yoki qishki transfer oynasida erkin agent sifatida olib kelish. Sababi futbolchining “Kopengagen” bilan amaldagi shartnomasi 2025-yilning oxirida yakuniga yetadi.
E’tiborlisi shundaki, Runi Barji Kuvaytda tug‘ilgan bo‘lishiga qaramay, Shvetsiyaning yoshlar terma jamoasida o‘ynab keladi. U “Kopengagen” jamoasi bilan uch marta Daniya chempioni bo‘lgan, shuningdek, ikki bor mamlakat kubogini qo‘lga kiritgan.
Izoh (0)