Klublar o‘rtasidagi Jahon chempionati 2-tur uchrashuvida Angliyaning “Manchester Siti” klubi Birlashgan Arab Amirliklarining “Al-Ayn” jamoasiga qarshi maydonga tushdi. Pep Gvardiola shogirdlari raqib darvozasiga javobsiz 6 ta gol urib, yirik hisobdagi g‘alabani qo‘lga kiritdi.
Hisob 8-daqiqada ochildi — Ilkay Gundo‘g‘an aniq zarbasi bilan jamoasini oldinga olib chiqdi. 27-daqiqada esa argentinalik Klaudio Echeverri hisobni 2:0 ko‘rinishiga keltirib qo‘ydi. Taym so‘nggida Erling Holand penaltidan gol urib, tanaffusga “shaharliklar”ni 3:0 hisobida olib chiqdi.
Ikkinchi bo‘limda ham “Siti” ustunlikni davom ettirdi. 73-daqiqada Gundo‘g‘an o‘zining dublini nishonladi, 84-daqiqada esa Oskar Bobb ham o‘z nomini tabloga yozdirib qo‘ydi. Yakuniy gol 89-daqiqada Rayan Sherki tomonidan kiritildi — 6:0.
Ushbu g‘alaba evaziga “Manchester Siti” 2 ta o‘yindan keyin 6 ochko to‘plab, pley-off bosqichiga yo‘l oldi. “Al-Ayn” hisobida esa hali ochko mavjud emas.
O‘zbekistonlik himoyachi Abduqodir Husanov o‘yinni asosiy tarkibda boshladi. Futbolchi 58-daqiqada sariq kartochka olgan bo‘lsa, 61-daqiqada o‘z joyini Oskar Bobbga bo‘shatib berdi.
Klublar o‘rtasidagi Jahon chempionati — 2-tur
23-iyun, dushanba
“Manchester Siti” — “Al-Ayn” 6:0
Gollar: 1:0 — Gundo‘g‘an (8), 2:0 — Echeverri (27), 3:0 — Holand (45+5, pen), 4:0 — Gundo‘g‘an (73), 5:0 — Bobb (84), 6:0 — Sherki (89).
Izoh (0)