Aktyorlik san’ati liboslar bilan doimiy muloqotni taqozo etadi. Qolaversa, ko‘plab ijodkorlar tez-tez moda uylarining elchilariga aylanishadi, shu sababli ular matolar, bichimlar va fasonlar haqida boshqalardan ko‘ra yaxshiroq bilishadi. Biroq o‘z kiyim brendini yaratish butunlay boshqa masala. Kimdir bu orqali dizaynerlik karyerasi haqidagi orzularini ro‘yobga chiqarsa, kimdir daromadini o‘ylaydi, yana kimdir esa do‘konlardan o‘ziga mos narsani topa olmaydi.

Meri-Keyt va Eshli Olsen

Opa-singil Meri-Keyt va Eshli Olsenlar 2006-yilda The Row brendiga asos solishdi. Bugungi kunda ushbu brend taxminan bir milliard dollarga baholanadi. Hammasi o‘n sakkiz yoshli Eshlining bozordagi mahsulotlardan ko‘ngli to‘lmay, mukammal futbolka yaratishga qaror qilishidan boshlangan.


Brend nomi Londonning benuqson tikuvchilik mahorati bilan mashhur bo‘lgan Savile Row ko‘chasiga ishoradir. 2024-yilda Chanel va L’Oréal egalari kompaniyaning aksiyalarini sotib olishdi. Shunga qaramay, Olsenlar nazorat paketini o‘zlarida saqlab qolishdi. The Row sifat va bichim birinchi o‘rinda turadigan, logotipsiz minimalist estetikaning yorqin namunasiga aylandi. Kompaniya, shuningdek, o‘zining sumkalari bilan ham katta shuhrat qozondi.

Bred Pitt

2019-yilda Bred Pitt Sat Hari Xalsa bilan birgalikda “God’s True Cashmere” brendiga asos soldi. Hammasi Sat Harining tushidan boshlangan: tushida Bred hayotida ko‘proq mayinlik bo‘lishini so‘ragan emish. Aytishlaricha, aktyor bundan ikki kun oldin o‘z stilisti bilan aynan shu haqda gaplashgan ekan. Do‘konlardan mos variant topa olmagach, Sat Hari unga o‘zi kashmirdan ko‘ylak tikib bergan. Bunda qanchalik haqiqat borligini aytish qiyin, biroq hozir aktyorning o‘z brendi borligi haqiqat.


Brend qimmatbaho toshlardan yasalgan tugmali, yuz foizlik kashmirdan tikilgan gender-neytral liboslarga ixtisoslashgan. Bunday ko‘ylakning narxi kamida 2000 dollarni tashkil etadi. 2025-yilda esa brendning “God’s True Linen” nomli zig‘ir matosidan tikilgan kiyimlari chiqdi.

Riz Uizerspun

Gollivudning mashhur aktrisalaridan biri Riz Uizerspun 2015-yilda Draper James brendiga asos solgan. Brend aktrisaning buvisi va bobosi sharafiga nomlangan. U janubiy uslubdagi ayollar kiyimlari, aksessuarlar va uy-ro‘zg‘or buyumlarini sihlab chiqaradi.

2022-yili Draper James Kohl’s bilan hamkorlik shartnomasini tuzdi. Oradan bir yil o‘tgach, Uizerspun aksiyalarning 70 foizini Consortium Brand Partners fondiga sotdi. Shunga qaramay, u direktorlar kengashidagi o‘rnini va ijodiy hamkorlik rolini saqlab qoldi. 2025-yilda o‘zining o‘n yilligini nishonlayotgan Draper James kengayishda davom etmoqda: Charlstonda do‘kon ochish hamda yangi toifadagi, jumladan, bog‘ mebellari va uy hayvonlari uchun mahsulotlar chiqarishni yo‘lga qo‘yish rejalashtirilgan.


Gvinet Peltrou

Gvinet Peltrou kosmetika bozorida ko‘proq tanilgan edi, ammo endilikda u o‘z moda imperiyasini muvaffaqiyatli qurmoqda. Dastlab 2016-yilda yo‘lga qo‘yilgan Goop Label o‘tgan sentyabr oyida keng ko‘lamli rebrendingdan o‘tkazilib, GWYN deb nomlandi. Brend “aqlli garderob” konsepsiyasiga e’tibor qaratadi — keng bichimli paltolar, klassik ko‘ylaklar shular jumlasidan. Ilgari The Row va Maison Margiela brendlarida ishlagan Sofiya Menasse liniyaning yangi kreativ direktori etib tayinlandi.


Gvinet Peltrou har bir modelni yaratish va sinovdan o‘tkazishda shaxsan o‘zi ishtirok etadi. Har oy 200 dan 2000 dollargacha bo‘lgan narxlarda kichik hajmdagi kapsula to‘plamlari chiqariladi. 2024–2025-yillarda Goop yo‘nalishi sezilarli (45% gacha) o‘sishni qayd etdi.

Penelopa Krus

Agar kino bo‘lmaganida, Penelopa Kruz o‘zini dizaynga bag‘ishlagan bo‘lardi. Aktrisa singlisi Monika bilan birgalikda Agent Provocateur uchun L’Agent deb nomlangan bir nechta ichki kiyimlar to‘plamini yaratdi. Opa-singil Kruzlar to‘plamlarga shunchaki o‘z nomini beribgina qolmay, eskizlarni ishlab chiqish va matolarni tanlashda ham faol ishtirok etishdi.


Shuningdek, Penelopa reklama roliklariga rejissyorlik qilib, ularga turmush o‘rtog‘i Xavyer Bardem va Irina Sheykni taklif qildi. U ichki kiyimlardan tashqari, hashamatli aksessuarlar bilan ham faol shug‘ullanib, Ispaniyaning Loewe modalar uyi uchun The Cruz nomli sumkani yaratdi. 2018-yilda esa Atelier Swarovski uchun taqinchoqlarning kapsula to‘plamini ishlab chiqdi.