O‘zbekistonda 2026-yilda sun’iy intellekt asosida ishlab chiqilgan maxsus chatbotlarni tumanlar darajasida joriy etish rejalashtirilmoqda. Bu haqda Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi direktori Botir Daminov ma’lum qildi.

Qayd etilishicha, hozirda buyrak kasalliklarini davolashda ilg‘or tashxis va muolaja usullari qo‘llanilmoqda. Bir paytlar hayot uchun xavfli hisoblangan buyrak yetishmovchiligi endilikda zamonaviy tibbiyot yutuqlari orqali samarali davolanmoqda. Bu borada markazda muhim natijalarga erishilmoqda.

Ma’lumotlarga ko‘ra, mazkur markazda 2025-yildan boshlab buyrak transplantatsiyasi amaliyoti yo‘lga qo‘yilgan. Shuningdek, so‘nggi yillarda multisprial kompyuter tomografiyasi, denzitometriya, immunologik qon tahlillari, buyrak biopsiyasi kabi yangi diagnostika usullari joriy etilgan. Davolash jarayonida esa gemodiafiltratsiya, plazmaferez, uzoq muddatli buyrak o‘rinbosar terapiyasi va laparoskopik jarrohlik usullari qo‘llanilmoqda.

2026-yilda sun’iy intellekt texnologiyalarini nafaqat erta tashxis, balki xavf guruhlarini monitoring qilish, dializ sifati va transplantatsiya natijalarini baholash jarayonlariga ham tatbiq etish rejalashtirilgan.

Bundan tashqari, birlamchi bo‘g‘in tibbiyot xodimlari uchun buyrak kasalliklari bo‘yicha profilaktika, sog‘lom turmush tarzi va to‘g‘ri ovqatlanishga oid bilimlarni oshirish maqsadida “Nefrologlar maktabi” faoliyati yo‘lga qo‘yilishi ko‘zda tutilgan.