Toshkent shahri Mirzo Ulug‘bek tumanida joylashgan “Navro‘z” dehqon bozori hamda “Bo‘z bozor” atrofidagi rekonstruksiya ishlari yuzasidan ijtimoiy tarmoqlarda turli talqinlar paydo bo‘ldi. Shu munosabat bilan tuman hokimligi axborot xizmati qo‘shimcha tushuntirish berdi.

Idoraga ko‘ra, ushbu bozorlar buzilib, qaytadan qurilmaydi. Aksincha, mavjud holatidan kelib chiqib, renovatsiya qilinadi va zamonaviy infratuzilma shakllantiriladi. Jarayon davomida savdo rastalari, kirish-chiqish yo‘laklari, zinalar hamda maxsus yo‘laklar ta’mirlanib, tadbirkorlar va aholi uchun qulay sharoitlar yaratiladi.

Shuningdek, bozorlar faoliyatini tubdan takomillashtirish, yashirin iqtisodiyotni qisqartirish va zamonaviy boshqaruv mexanizmlarini joriy etish rejalashtirilgan. Bozorlar bosqichma-bosqich raqamlashtirilib, savdo jarayonlarining ochiqligi va shaffofligi ta’minlanadi. Xususan, hududlarda kuzatuv kameralari o‘rnatilishi, tadbirkorlarning maxsus terminallar orqali faoliyat yuritishi ko‘zda tutilgan.

Bozor hududida maxsus vaziyat markazi tashkil etilib, u barcha iqtisodiy, moliyaviy va nazorat jarayonlarini muvofiqlashtiruvchi yagona markaz sifatida faoliyat yuritadi. Hokimlikka ko‘ra, mazkur yondashuv savdo subyektlarining qonuniy faoliyatini qo‘llab-quvvatlash, naqdsiz hisob-kitoblarni kengaytirish hamda aholiga sifatli xizmat ko‘rsatishga xizmat qiladi.

Avvalroq tumanda “Navro‘z” va “Bo‘z bozor”da keng ko‘lamli rekonstruksiya ishlari rejalashtirilayotgani haqida xabar berilgandi. Hokimlikning qayd etishicha, ushbu xabar ayrim manbalar tomonidan bozorlar buzilishi sifatida noto‘g‘ri talqin qilingan bo‘lib, amalda gap mavjud bozorlarni saqlagan holda renovatsiya qilish haqida bormoqda.