Samarqand viloyatining Payariq tumanida 33 yoshli ayol xususiy klinikada ukol noto‘g‘ri qilingani oqibatida vafot etgani haqida xabarlar tarqaldi. Bosh prokuratura matbuot xizmati uning o‘limini tasdiqladi.

Ma’lum qilinishicha, voqea 12-yanvar kuni sodir bo‘lgan. Ayni paytda prokuratura tomonidan tergovga qadar tekshirish harakatlari olib borilmoqda. Marhumaning o‘lim sabablarini aniqlash maqsadida sud-tibbiyot ekspertizasi tayinlangan.

Ukoldan so‘ng vafot etganlar

2024-yilning noyabrida Qashqadaryo viloyatining Shahrisabz shahridagi klinikada 28 yoshli ayolni bo‘yniga “proba”siz qilingan antibiotik ukol sababli vafot etgandi. U anginasi shishib ketgani bo‘yicha murojaat qilib kelgan. LOR shifokor uning tomoq qismidan “Seftriakson” va “Deksametazon” dori vositalari aralashmasidan inyeksiya yuborganida bemor ayolning tili tortilib ketgan. Ko‘rsatilgan tibbiy yordamga qaramasdan ayol sog‘lig‘i yomonlashib, hodisa joyida vafot etgan. 2025-yilning aprelida Buxoro shahridagi xususiy klinikada 11 yoshli bola tibbiy muolajadan so‘ng vafot etgandi.