Qatarning Doha shahrida shaxmatning rapid va blits yo‘nalishlari bo‘yicha kattalar o‘rtasidagi Jahon chempionati yakunlandi. Blits bo‘yicha jahon chempionatida kumush medalni qo‘lga kiritgan Nodirbek Abdusattorov final uchrashuvidan so‘ng o‘z fikrlari bilan o‘rtoqlashdi.

“Natijamdan juda xursandman. Saralash bosqichida tay-breklar masalasida ham omad kuldi. Eng muhimi, Top-4 ishtirokchilar qatoriga kirishning o‘zi katta yutuq. Finalga chiqqanimdan mamnunman va oxirigacha bor kuchimni berdim. Rostini aytsam, g‘alabaga juda oz qoldi”, dedi Abdusattorov.


Shuningdek, Nodirbek pley-off formati haqida ham to‘xtalib o‘tdi. Uning fikricha, 8 nafar shaxmatchi pley-offga chiqqanida musobaqa yanada qiziqarliroq bo‘lardi:

“Menimcha, pley-off bosqichiga 8 nafar shaxmatchi chiqqanida, bellashuvlar yanada qiziqarliroq bo‘lar edi. Sababi top-4 tizimi ba’zan juda keskin va biroz tasodifiy bo‘ladi”.


Finaldagi burilish nuqtalari haqida esa Nodirbek ochiq gapirdi:

“O‘zimni yaxshi his qilayotgandim. Ikkinchi o‘yinda Magnusning imkoniyatlarini past baholadim. O‘yin durang bilan yakunlanishi mumkin edi, lekin raqib juda aniq o‘ynadi. Oxirgi o‘yinda ham vaziyat keskin edi: tashabbus uchun piyoda qurbonlik qildim, ammo keyin qanday yo‘l tutishni bilmadim. Endshpil menga biroz qiyinroq edi va u oxirida o‘z imkoniyatidan foydalandi. Magnusni tabriklayman”.


​Ma’lumot uchun, Nodirbek Abdusattorov yarim final bahslarida 15 ochko bilan 1-o‘rinda yakunlagan hindistonlik Arjun Erigaisiga qarshi bahs olib bordi. O‘zaro qarama-qarshilikda o‘zbekistonlik grossmeyster 2,5:0,5 hisobida raqibidan ustun keldi va finalga yo‘l oldi. Hal qiluvchi bellashuvda esa 1,5:2,5 hisobida Magnus Karlsenga mag‘lub bo‘ldi. Shu tariqa norvegiyalik grossmeyster rapid va blits bo‘yicha Jahon chempionatining har ikki yo‘nalishida g‘olib bo‘ldi. Nodirbek Abdusattorov kumush medalga ega chiqdi.