O‘zbekiston Olimpiya terma jamoasi bosh murabbiyi Ravshan Haydarov 2026-yilgi U-23 Osiyo kubogi oldidan Milliy futbol markazida tashkil etilgan matbuot anjumanida ishtirok etdi.

Murabbiy jamoaning tayyorgarligi va musobaqadan kutilmalarini ma’lum qildi. Unga ko‘ra, jamoa 7-dekabrdan boshlab Toshkentda dastlabki oʻquv-mashg‘ulot yig‘inlarini boshlagan. Yig‘inga 28 nafar futbolchi jalb qilingan va ularning imkoniyatlari sinovdan o‘tkazilgan. Mashg‘ulotlar davomida futbolchilar turli mavsumni o‘tkazgani sabab, ba’zilari yig‘inga kechroq qo‘shilgan.

Yig‘inning navbatdagi bosqichi Qatarda davom etadi. U yerda jamoa Iordaniya va Qatar U-23 terma jamoalariga qarshi so‘nggi nazorat o‘yinlarini o‘tkazadi va shundan so‘ng Osiyo kubogiga yo‘l oladi.

Haydarovning ta’kidlashicha, musobaqada 2005 va 2006-yillarda tug‘ilgan, shuningdek, undan kichik futbolchilar bilan ishtirok etishga alohida e’tibor qaratilgan. Bu strategiya Olimpiya yoshidagi futbolchilarni sinovdan o‘tkazish va tajriba orttirish maqsadida amalga oshiriladi. 2003 va 2004-yillarda tug‘ilgan futbolchilar esa klublarida o‘z o‘rnini topgan, Osiyo kubogi va Jahon chempionatida ishtirok etgan.

Jamoa sardori masalasi ham muhokama qilindi. Haydarovning aytishicha, jamoada 2–3 nafar yetakchi futbolchi mavjud, ammo ular orasidan yaqqol sardor sifatida tanlab ko‘rsatish qiyin. Shu sababli aksariyat o‘yinlarda boshqa futbolchilar sardor sifatida maydonga tushgan. Kim sardor bo‘lishi masalasi tez orada hal qilinadi.

Bosh murabbiyga ko‘ra, jamoa Osiyo kubogida yuqori maqsadlarni ko‘zlaydi. O‘zbekiston Olimpiya terma jamoasi 2018-yilda aynan Ravshan Haydarov boshchiligida Osiyo chempioni bo‘lgan, so‘nggi ikki musobaqada esa (O‘zbekiston-2022 va Qatar-2024) Temur Kapadze qo‘l ostida finalga chiqqan. Shu bois, Haydarov jamoa ushbu musobaqada ham chempionlik uchun harakat qilishini bildirdi.

Ma’lumot uchun, 2026-yilgi U-23 Osiyo kubogi 6–25-yanvar kunlari Saudiya Arabistoni mamlakatida o‘tkaziladi.