Maktabgacha va maktab taʼlimi vazirligi Oʻzbekiston maktablarida qishki taʼtil qachondan boʻlishini maʼlum qildi.

Qayd etilishicha, hukumatning 2017-yil 15-martdagi 140-sonli qaroriga muvofiq, 2025/2026-oʻquv yilida umumiy oʻrta taʼlim maktablari oʻquvchilari uchun qishki taʼtil 28-dekabrdan, (boshlangʻich 1-4-sinflarda esa 27-dekabr — shanba kunidan) boshlanadi.

Taʼtil kelasi yilning 10-yanvarigacha, yaʼni 14 kalendar kunida davom etishi rejalashtirilgan.

Darslar esa 2026-yilning 11-yanvari yakshanba kuni boʻlgani bois, III chorak uchun 12-yanvardan boshlanadi.

Oʻtgan yilda oʻquvchilar uchun shunday dam olish kunlari 29-dekabrdan boshlangan edi. 2025-yil 11-yanvar, shanba kuniga belgilangan darslar esa 2024-yil 28-dekabr kuniga koʻchirilgan.