Osiyo taraqqiyot banki Oʻzbekistonga kichik biznesni rivojlantirish uchun 300 million dollar miqdorida qarz ajratishni maʼqulladi. Mablagʻning uchdan bir qismi imtiyozli shartlarda beriladi.



Ushbu ikkinchi kichik dastur inklyuziv moliyalashtirish uchun huquqiy va institutsional asos yaratish bo‘yicha birinchi dasturda boshlangan islohotlarni chuqurlashtirishga qaratilgan. Bunga mikrokreditlar limitini oshirish, mikromoliyalashtirish qoidalarini takomillashtirish, Ayol tadbirkorlarni moliyalashtirish xalqaro kodeksiga qoʻshilish va Islom mikromoliya tizimi uchun normativ bazani shakllantirish kiradi.

“OTB Oʻzbekistonning yanada inklyuziv va bozorga yoʻnaltirilgan moliyaviy tizimga oʻtishini qoʻllab-quvvatlashdan faxrlanadi”, degan OTBning Oʻzbekistondagi doimiy vakolatxonasi rahbari Kanokpan Lao-Araya.

Tegishli dastur doirasida “hozir sotib oling, keyin toʻlang” kabi yangi moliyaviy xizmatlarni tartibga solish va raqamli moliyaviy nazoratni kuchaytirish orqali isteʼmolchilar huquqlarini himoya qilishga qaratilgan yangi siyosat choralari joriy etilgan.

Bundan tashqari, moliya sektorida gender tengligi siyosatini qoʻllab-quvvatlash, moliyalashtirishda gender kvotalarini belgilash va jins boʻyicha ajratilgan maʼlumotlar asosida hisobot berish tizimi kengaytirilgan. Shuningdek, dasturning yana bir muhim elementi — mikromoliya sektorini tarkibiy transformatsiya qilish ekani va buni depozit qabul qiluvchi mikromoliya banklarini tashkil etish orqali amalga oshirilishi maʼlum qilindi.

Moliyaviy barqarorlikni taʼminlash maqsadida xavflarni baholashga asoslangan normativ-huquqiy va nazorat bazasi joriy etilmoqda. Hozirgacha bunday banklarni tashkil etish uchun ikkita dastlabki litsenziya berilgan.

2025-yilda OTB va Oʻzbekiston Respublikasi oʻrtasidagi hamkorlikka 30 yil toʻlgan. Oʻzbekiston 1995-yilda OTBga aʼzo boʻlgan va shu vaqtdan beri bank mamlakatga davlat sektori uchun 14,6 milliard dollar miqdorida qarz, grant va texnik koʻmak taqdim etgan.

Dastur texnik koʻmak bilan ham qoʻllab-quvvatlanadi, bu institutsional salohiyatni oshirish va islohotlarning barqarorligini taʼminlashga xizmat qiladi. Ikkinchi kichik dastur 2025–2027-yillarga moʻljallangan uchinchi kichik dasturni oʻz ichiga olgan kengroq yondashuvning bir qismi boʻlib, u amalga oshirish salohiyatini va institutsional infratuzilmani yanada mustahkamlashi ta’kidlandi.

Oktyabr oyida bank Oʻzbekistonda iqtisodiy islohotlar va global integratsiyani qoʻllab-quvvatlash uchun 500 million dollar ajratishi xabar qilingandi.